乜呢期咁鬼多梦发嘅呢？朝早畀个电话嘈醒之后又瞓返，于是又开始发梦嘞。

　　又系发梦返咗上歌诗达。今次主要系梦见自己喺船上嘅室内游泳池游水——查实歌诗达个泳池系露天嘅，
游游下水，重要喺船舱里面周围爬墙，感觉好似啲电影里面，嗰啲英雄拯救船员同乘客噉样。

　　老实讲，今日个梦就乏善足陈嘅，而且我都唔系好记得。不过既然咁有缘，噉就摆多少相出嚟畀大家睇下
真正嘅歌诗达邮轮嘅内部系点样咖啦。免得有啲人睇广告又想象唔到，信广告又可能大失所望。

　　上船第二朝起床，食咗个丰盛到不得了嘅自助早餐之后，就喺船头嘅甲板周围影下相。船头已经准备好晒
啲沙滩椅，等你随时可以喺处晒太阳。不过船头嘅缺点就系风比较大，但相对可能安静啲。

　　船头有两个好大、好舒服嘅暖水按摩池，落去浸住暖水，晒太阳、吹海风，噉先叫做“叹世界”吖嘛！



　　畀张近镜啲嘅过你哋睇，等你哋想象下，噉样浸住暖水，享受埋水力按摩。哇！“蔡澜叹世界”都可能系
不外如是！不过如果浸完从暖水里面企起身，迎面吹阵海风埋嚟，噉就……哈哈哈！



　　按照国际航海嘅规定，每个上船嘅游客都必须接受逃生演习训练，学识点样着救生衣，同埋如果一旦落咗
水点样向前来搜救嘅救援人员展示你嘅位置。



　　每间房嘅门口嗰个柜里面都有足够数量嘅救生衣，个个都着起身，然后集中喺有啲昏暗嘅酒吧里面，真系
有如点点繁星，好鬼好睇！



　　你睇，嗰个鬼佬摄影师又不失时机噉帮啲人客影相揾钱嘞。



　　玩完逃生演习训练，我哋就着埋救生衣去中层甲板影下相。



　　噉喺中层甲板嘅酒吧影晒全景就当然系唔同啲啦！



　　个泳池查实好鬼细，我三扒两拨就可以游到对岸，不过泳池都好深下，唔啱细路仔玩。同埋最绝核嘅系，
呢一个泳池里面嘅水系直接净化咗嘅海水——系咸咖！终于都叫做喺海上“游”过水嘞！



　　同泳池相隔冇几远，又有一个暖水按摩池，呢个池唔会畀风吹到，所以系最受欢迎嘅！你睇，而家啱好有
四条美人鱼喺里面欢紧！



　　喺泳池旁边有沙滩椅之外，重有沙滩遮，坐喺处（读“庶”或者“恕”音）睇书、听歌、倾偈、晒太阳、
饮嘢、捉棋、睇住啲人玩游戏……一乐也！



　　日头唔系好晒嘅时候，啲人经常会喺泳池旁边嘅甲板上面玩游戏，船上娱乐部重会教我哋跳舞、健身操。



　　呢个三人连线嘅游戏，就系由可爱嘅Ｒａｃｈｅｌ嚟领衔指挥嘅！六个人九张凳分两组就玩得，第日可以
喺啲派对玩。