波，系圆嘅——废话！波，当然系圆咖啦！唔通系方嘅咩？！冇错！的确，波系圆嘅！但系你又知唔知，
呢句“波系圆嘅”其实早已经深入民心，成为一个经典嘅句子？！
查实，我系一个非常之唔钟意睇体育节目，尤其系足球嘅人。因为我觉得足球好粗暴野蛮，唔环保之余，
重好鬼闷添！
但系有一个人却可以令我即使唔钟意足球，都钟意睇佢报体育新闻，呢个就系无线电视新闻部前体育新闻
采访主任伍晃荣先生嘞！伍晃荣先生有几吸引？睇下佢点样播体育新闻，你就知佢有几吸引：
射十二码有两个可能，一系入，一系唔入。
葡萄牙个保力达想笠过龙门李云在，点知连条横楣都笠过埋。
射得靓，救得重靓！
救到呢个世界波嘅，唔系龙门，而系条柱。几时都话，门柱系龙门最好嘅朋友。今次乃又一例证。
通常乌龙波都系靓波。
有咩比一个乌龙波更加好嘅呢？答案就系两个乌龙波。
可怜个芝拉华特，好似黄大仙噉——有球（求）必应。
哈哈哈！睇完呢啲噉样嘅报道，问你重点忍得到唔继续睇埋落去呢？伍晃荣先生就系一个噉样嘅人——
佢风趣幽默、大胆创新，言辞辛辣嘅同时亦不免带点温情，鬼马抵死嘅揶揄后面又总会有啲励志：
忘记８６年上帝之手啦！碧咸集中精神，用脚将波射入。四年前碧咸千夫所指，而家一口污气全消，短短
四年，令碧咸成为天之骄子。
佢哋输嘅并唔系实力，而系少少嘅运气。
英雄能敌千军万马，最后却逃唔过兄弟嘅出卖——舒米高成场左飞右扑挡住对方嘅射门，点知最后加利仔
却摆咗个乌龙。
连啲一时嘅口误都系咁令人津津乐道嘅：
非常果断嘅朗拿度犹疑不决噉一脚射入噃。（够晒前后矛盾）
朗拿度好波嗰阵真系好好波咖！（同“波系圆嘅”有异曲同工之妙）
碧咸式罚球，笑大人个口。（形容咗米赫洛域嘅罚球之余，重押晒韵添）
你都系返去揸车啦！（Ｆ１车神舒麦加玩票性质落场踢友谊赛，点知射门嘅时候一脚将个波射歪咗）
伍晃荣幽默、独特嘅风格，唔单止创出咗体育新闻报道嘅先河，而且重吸引到大批嘅观众留意佢嘅报道。
有调查报告显示，无线六点半新闻嘅收视其实并唔系好高，但只要到咗最后几分钟，听见人哋话：“伍晃荣，
交畀你讲体育嘞”嘅时候，啲收视就会突然之间猛升几点。然后听见伍晃荣讲一句“好啊，唔该”，跟住佢就
好似电影临完场，个主角表演单人匹马直闯龙潭虎穴噉样：
港联对瑞典，李健和接应长传，第一时间抽射——呢个系李健和嘅看家本领，不过佢当ｆｉｔ嗰时射都系
咁上下！
上季阿仙奴次回合对富咸，云达沙玩嘢，卖弄脚法，畀雷耶斯抢咗，重射入埋……反啦，反啦，反死嘞！
有个罚球喺右路偏左, 唔系唔系，系右路偏右至啱……差唔多到边线位置，跟住一射——入咗！
大家落足眼力去睇嘞！皮球好似有生命嘅怪物噉飞入网喎，可怜嘅守门员连波皮都掂唔到！
哎呀，唔得咪下次啰，使乜噉喈，傻猪嚟嘅！
你噉都值几千万呀？
千祈唔好以为呢场波好紧张，系我讲得紧张咋！（２００２世界杯克罗地亚对墨西哥，成场波平淡无奇）
无论赢波或者输波都晋级嘅巴西打“留波”，留力打嘅波噉解。
留力嚟做乜？留力下季唔得呀？
费高生日嘅时候入波，伍晃荣就话：“费高，生日快乐！”所以好多人都话佢系“体坛活字典”。
有场比赛个球证系噉出错，第一次佢就话：“球证出错好平常。”第二次就话：“球赛出错系好平常。”
到第三次佢就话：“球证出错，又出错？”
通常六点几七点呢个时候，好多人都喺屋企一路食紧饭一路睇新闻。如果唔想喷饭嘅，最好就系等埋呢句
“无线电视记者，伍晃荣报道”先。不过佢有时都会变下花款嘅，例如有一次佢讲完新闻就问身边嘅赵海珠：
“珠珠啊，有冇谂过将来结婚有个童话式嘅婚礼呢？”“珠珠”点咗下头就答佢：“我谂好多女仔都好想咖！
噉由今年九月开始呢，去迪士尼乐园行婚礼就可以试下呢种滋味嘞。不过唔知价钱贵唔贵，由罗辉翔讲下。”
听完罗辉翔报道之后，伍晃荣对住“珠珠”点咗下头：“值得认真谂下！”“珠珠”马上笑住对佢点咗下头。
“噉你谂下喇，”坐喺旁边嘅李臻都加咗句：“新闻报道完毕嘞，再会！”“珠珠”转过头对住佢笑咗一下，
场面十分温馨——只要伍晃荣喺处，你就唔会觉得佢哋系播紧新闻，可能只不过闲话家常，又或者系做紧处境
喜剧。所以我一直都当伍晃荣系体育新闻艺术工作者，而唔系记者。
伍晃荣曾经话过：“好波不妨一睇再睇。”所以，伍晃荣金句又点可能唔一睇再睇呢？我哋继续：
一队波真系需要一个好龙门。
离门三码施展绝技——打飞机。
呢个球唔入重难过入！
同个波有仇咩？！
通常乌龙波都系好波。
倒挂嘅乌龙波重好波！
伍晃荣最钟意就系对住电视画面作设计对白配音：
阿积士嘅后卫被飞燕诺前锋推跌，对方前锋跟手射门入网，阿积士后卫同裁判理论，伍晃荣即时配音。
后卫：佢推我啊，推我先入波咖！
裁判：教精你啦，禁区里面推人系合法嘅。
后卫：佢双手推我咖（后卫一路讲一路做手势）！
裁判：推人就梗系用双手咖啦！
大连实德对阿联酋艾因，科萨好激动噉用双手抱住球证个头以示抗议，伍晃荣马上就话：“唔好再玩喇！
会死人咖！”
热刺对富咸，泰莱扑跌咗戴维斯，球证判罚十二码，泰莱抗议，伍晃荣又嚟玩嘢：
泰莱：自己插水啊！自己插水啊！
球证：睬你都多余嘅！
车路士对住列斯联，列斯联嘅后卫马迪奥摆乌龙之后跪地不起，伍晃荣跟住就话：“起身啦！唔错都错咗
咯！”
见到观众席上有个漫不经心嘅细路女四围望，伍晃荣就扮僆妹：“睇个肥佬唱歌好过睇波！”
２００５年６月３０号晚，徐蕙仪有啲唔自然噉讲：“伍晃荣啊，交畀你讲体育消息。”伍晃荣喺讲曼联
新老板格莱泽去奥脱福球场嗰阵遇到反收购嘅曼联球迷示威嘅新闻嘅时候，竟然好罕有噉食咗四次螺丝。报完
体育新闻，就提到南极嘅企鹅。等黄嘉瑜讲完企鹅爸爸点样好坚强噉孵咗只企鹅仔出嚟之后，伍晃荣就话嘞：
“呢次新闻报道完毕，再会！”然后，熟悉嘅音乐响起，坐喺另外一边嘅邱文华同伍晃荣握手——原来，嗰日
就系伍晃荣最后一次喺《六点半新闻报道》报体育消息，可能佢都唔舍得。
伍晃荣任职投资银行嘅仔话：“爸爸，你每日只系工作三分钟。”伍晃荣马上就纠正佢：“我一日返十个
钟，但将最精彩嘅三分钟畀你睇！”就系噉，伍晃荣将自己每日最精彩嘅三分钟畀咗个仔睇，呈献畀电视观众
睇。我谂，好多观众睇体育新闻，其实不过系为咗睇伍晃荣每日最精彩嘅三分钟！
“无线电视记者伍晃荣报道”呢句一出，大家都知道新闻报完。但呢一句往往会令人谂起楷叔张悦楷嗰句
“欲知后事如何，且听下回分解”，于是大家又会好期待噉等第日傍晚再欣赏伍晃荣每日最精彩嘅三分钟！
“经典往往并不代表永恒！”——伍晃荣喺旧年无线嘅节目《新闻话事·人》里面曾经讲过呢句说话。喺
伍晃荣访问苏凌峰嗰集嘅尾声，佢攞出一张１９８２年影嘅相畀苏凌峰睇——张相里面有李汶静（已身故）、
何洁贞、陆嘉敏、伍晃荣同埋苏凌峰等人。伍晃荣好深情噉话：“如果可以后生多一次，噉几好呢！”——佢
都曾经讲过：“退休嘅人系噉咖！所以唔好退休！”
所以伍晃荣退而不休，２００６年重出嚟主持世界杯赛事，又出咗本自传——《波系圆嘅》……
旧年今日嘅呢个时候，应该系我离伍晃荣先生最近嘅时候，因为当时我正喺香港嘅水域。一年后嘅今日，
我感觉同伍晃荣先生更加接近嘞，因为佢从此长存喺我嘅心中！
虽然伍晃荣曾经抱怨过自己有名无利，但系睇下岭南大地以及海外千千万万咁热爱佢、唔舍得佢嘅观众，
比起坐拥过亿身家但系都要跳楼，或者被病魔折磨到不似人形嘅大明星，夫复何求呢？
“无线电视记者伍晃荣报道”呢句经典嘅结束语我哋以后虽然都冇机会再听到真人讲，但系我哋都不禁要
问：“阿盲地位，谁可代替？”
