２００７年４月２２号，越南岘港最低２８℃，最高３５℃——我谂你哋一定未试过！唔系话你哋未试过
噉样嘅气温，而系话你哋一定未试过喺四月份经历噉样嘅气温。

　　２００７年４月２２号，越南岘港晴空万里。朝早瞓醒嘅时候，我哋乘搭嘅Ｃｏｓｔａ　Ａｌｌｅｇｒａ
邮轮早就已经靠岸。食早餐嘅时候，我哋甚至可以影到怀疑系海市蜃楼嘅山景。







　　经过半日，查实大概系八个钟头左右嘅旅程，我哋又返到船上。除咗买咗张越南地图同一套明信片之外，
我乜都冇买到。嗰套明信片大概有一半寄咗返嚟，我甚至几乎冇喺街上面买过嘢食，除咗陈氏夫妇买嘅生果，
搭车返码头嘅时候食咗几只人哋食唔晒嘅贵妃蚌，咁鬼死热嘅天气，除咗饮水之外，你唔会有太大嘅食欲！

　　返到上船，放低啲行李，马上冲去自助餐厅，一杯冻饮、两件点心、几嚿生果，当堂舒服返晒！

　　口福解决，但系其它呢？成身烂臭汗点见人？于是马上返房，剥晒衫裤剥晒鞋，换条性感泳裤，被（此处
读“披”，盖、遮覆噉解。）番条大浴巾就走上甲板嘅泳池游水，顺便去招蜂惹蝶！

　　由于个泳池唔大，三扒两拨就可以由一边游到另外一边，所以基本上系冇瘾嘅。但系胜在啲池水系直接从
海里面抽上嚟，经过净化处理咗嘅，所以游起上嚟十分放心，加上海水里面嘅盐分其实系可以消除到疲劳嘅，
因此游咗几下之后就觉得个人松晒。

　　游咗一阵，觉得个泳池太细嘞，根本发挥唔到我啲泳术，于是上水，走咗去浸按摩池。上个月已经讲过，
嗰啲按摩池放嘅都系暖水，浸喺里面晒太阳、吹海风嗰种舒服法——唉，绝非笔墨可形容！

　　呢个时候，甲板上嘅人都唔少，估计系趁重未开饭，上嚟吹下海风，影下日落之类噉。提到日落，真系要
望出去外面啊！呢个时候，只见嗰个咸蛋黄正慢慢噉沉落海，一啲都唔枨眼嘅金光伴住天际片片红霞，真系靓
啊！

　　我谂，呢个日落系我见过最靓嘅日落——除咗因为系喺海上睇之外，重因为我系浸喺温暖嘅按摩池里面。
唔知伍晃荣先生坐邮轮去台湾叹世界嘅时候，有冇好似我噉浸喺按摩池里面睇日落呢——老实讲，呢啲噉样先
叫做“叹世界”嘎嘛！

　　虽然搭邮轮去越南已经系一年前嘅旅程，但系呢个旅程畀到我非常之难忘嘅愉快经历——我永远都会记得
喺Ｃｏｓｔａ　Ａｌｌｅｇｒａ邮轮上面认识嘅人，成个旅程发生嘅事，有开心嘅，亦有唔多开心嘅。但系我
多数都只会记住啲开心嘅事，嗰啲唔开心嘅嘢锁埋佢一二角就系嘞！

　　人生在世，及时行乐，活在当下系最紧要嘅！当我哋遇到唔开心嘅人或者事嘅时候，只要我哋识得揾返啲
开心嘅记忆出嚟氹下自己，噉就咩事都冇啦！人生苦短啊，唔好畀嗰啲唔开心嘅嘢占据你嘅时间同空间！
要学嘉士伯啤酒个广告噉样——唔准唔开心！