黄师奶何许人也？当然就系夫家姓黄嘅师奶啦！

　　乜你呢期冇睇《师奶股神》咩？“黄师奶”乃系呢期最为得令嘅“师奶杀手”——因为喺呢个熊市压顶嘅
情况下，点样先可以杀出一条血路，“黄师奶”就系无数“蟹民”嘅“偶像救星”！！

　　不过今日我卢总所要恭贺嘅呢位“黄师奶”就唔系咩“师奶杀手”，更加唔系咩“师奶股神”——最起码
就目前而言，“黄师奶”只系黄先生嘅“师奶”、“恨你”、“爱人”、“老婆”、“未黄面婆”……

　　当然啦，“黄师奶”最近多咗个身份——黄先生个仔个妈。从此，“黄师奶”就必须开始过上一种“长忧
九十九”嘅新生活嘞。

　　上个礼拜，“６４”之前嗰日，当我悬喺半空中嘅时候，收到来自“黄师奶”嘅消息，话佢喜获一个８磅
重嘅男婴，而且母子平安，感谢我一直以来嘅关心。讲到呢一处，我就真系有多少惭愧嘞！事关我事前就真系
冇乜点关心过佢。唉，为世所迫啦，环境嘅问题啦，好多事情撞啱啦……总之一言难尽啦！

　　今年嘅年份就唔多好，具体点唔好法，大家都有目共睹，噉我就唔再多讲嘞。之但系黄先生今年合太岁，
而黄师奶就犯太岁。“犯太岁”代表变化，从冇细路到做咗人哋阿妈，呢个本身就系一种变化——黄师奶今年
诞下麟儿，正所谓“一喜挡三灾”，今年嚟自太岁嘅劫煞应该都化咗。黄先生今年合太岁，应该有升迁之象。
即使唔系升职加薪，做咗人哋老窦，都叫做系“地位提升”，如果有得加官进爵，呢个仔就更加系好脚头嘞！
因此我就赋诗一首，恭贺黄师奶弄璋之喜：

　　　　黄师奶够醒，黄师奶至劲，
　　　　黄师奶一生就生个茨菇椗。
　　　　黄家从此更兴盛，个个福寿又康宁，
　　　　时时遇着好事情，个仔实会好前程！

　　黄师奶收到之后，可能欢喜得非常，马上就回复大赞：卢总就系卢总，零舍不同！文采过人！用心至极！
贺词绝对有收藏价值！多谢晒！

　　噉最紧要系你黄师奶自己钟意嘅啫！只要黄师奶钟意，就一定会开心，噉就冇咁容易得咩“产后抑郁”，
跟住又可以照顾好啲个ＢＢ仔。ＢＢ仔可以健康快活成长，系每个做父母最希冀嘅事情，亦系卢总喜闻乐见嘅
事情！

　　我最近都收到唔少好消息：吾友复试第一名，准备继续深造，将来可能会成为伟大嘅设计师；吾另一友嘅
老婆喺最近发现怀有月余身孕，不过怕胎儿小气，唔可以太张扬……

　　咁多位朋友都生活得咁好，卢总就放晒心嘞！卢总最近都有遇到啲好事情——就系同“师奶股神”黄师奶
一齐上咗报称６月１０号出版嘅《舞台与银幕》。大家揾嚟睇下就知系咩事嘞——呢期嘅封面系王菲。