首先就澄清一样嘢：但凡系我识得而又欣赏或者在意嘅人牛一或者乜乜物物纪念日之类，只要我有时间、
有题材或者有心水嘅话，我都会大书特书，写番篇文字，以表我对佢嘅敬意。
因此，你哋会见到：５月２０号就有篇《靓女牛一，唔提唔得》——因为佢真系好靓女，而且我极之讨厌
当时全球风云一片黑嘅景况，希望藉住个靓女嚟调和一下紧张气氛；而４月１４号就有篇《新派玉女掌门生日
快活》——因为呢个靓女先至有绝对嘅资格接任玉女派掌门；２月２９号就有篇《麦嘉同顾修全谈“创富”》
——２月２９呢啲噉嘅牛一，四年先逢一闰，唔提点得？
所以，我４月１号嗰篇《陈茵媺系我嘅理想老婆人选》又点可能系咩“恶作剧”呢？米以为４月１号只系
“愚人节”先得嘎——４月１号更加系美国通用公司发明光管嘅日子；缅甸喺１９４８年嘅呢一日独立；中国
同印度喺其后两年嘅呢一日建交；过多两年阿爷就发表咗《矛盾论》；到１９７６年苹果电脑公司创立；三年
后伊朗伊斯兰共和国立国；翌年，中国开始发行外汇兑换券；从１９８５年开始，好多部法律都喺呢一日正式
实施生效，包括喺今年新修订嘅《中华人民共和国民事诉讼法》……而且，我喺文中都讲到明嗰日系陈茵媺嘅
牛一，重有冇必要去揣测我讲嘅系真定系假呢？重有，唔该阿“朱圆”、朱凌霞（责任编辑）、肖文（校对）
等尊驾搞清楚何谓“原文摘录”。“原文摘录”就应该系直接搬字过纸，学阿“陈梦吉”话斋：“一字一符号
皆不能改动。”至于你哋啲“翻译”……真系唔好意思嘞，有好多都系唔啱嘅。
好嘞，闲话休提，言归正传——讲返今日嘅主角Ｄｏｎａｌｄ。Ｄｏｎａｌｄ系边个啊？之唔系就系嗰个
可以令我“飞起黄耀明，腾出刘以达”嘅名人Ｍｒ．Ｄｏｎａｌｄ Ｔｒｕｍｐ啰——今日佢牛一啊！
１９４６年６月１４号，可爱嘅Ｄｏｎａｌｄ Ｔｒｕｍｐ降生于美国纽约市——对上有个家姐，其后就
多咗两个细佬同一个妹。佢老窦系开房地产公司嘅。而睇返阿Ｄｏｎａｌｄ嘅八字——佢五行系属土，八字又
过硬，继承佢老窦档生意系好适合嘅！
再睇下阿Ｄｏｎａｌｄ个面相：眉长过目，忠直有禄；颧鼻相称，福禄皆通，富贵双收，亦主有权有势；
两耳贴面，扬名富贵；鼻高直，有主见，准头圆润则财丰，鼻势高直则尊贵，鼻体匀厚则家兴，佢就合晒啦！
不过佢个鼻有少少歪，暗示佢如果捞偏门嘅话，都有好大机会会成功。而事实上，Ｄｏｎａｌｄ Ｔｒｕｍｐ
喺大西洋城嘅赌场上都捞得相当掂，坐紧第一把交椅；而佢手握住全美三大选美盛事嘅主办权亦系明证！地阁
饱满，擅管田土，佢拣呢行又冇死错人啦！
我谂，阿Ｄｏｎａｌｄ最成功嘅一点就系，行资产大买卖嘅路线。制造出好嘅商品出嚟，就要将佢脱手，
而唔系好似某啲人噉，死守住只会生金蛋嘅鹅，唔知只鹅几时会死咗，或者系畀人偷鬼咗去。我见过好多人发
唔到达，就系因为唔识得把握机遇，适时噉将自己手头上升紧值嘅嘢喺高位嘅时候抛售出去，苏州过后冇艇搭
——所以话“机不可失，时不再来”。
另外，阿Ｄｏｎａｌｄ成功其实都有借助“风水”。Ｄｏｎａｌｄ Ｔｒｕｍｐ曾经一度穷困潦倒，身负
数亿巨债，个人资产从１７亿暴跌到得返５亿，而且所有美国银行都唔肯贷款畀佢。佢惟有转向亚洲，尤其是
香港嘅资金求助。可能系亚洲啲财阀识得睇相啦，知道阿Ｄｏｎａｌｄ终须有日龙穿凤，所以就肯借钱畀佢，
不过条件就系必须听从风水行家嘅意见选择东山再起嘅地点。最后，风水行家选中咗佢啲资产里面嘅“垃圾”
——纽约曼哈顿哈德逊河滨一片荒草丛生嘅废墟之地。结果，呢片“垃圾”之地真系可以令到Ｄｏｎａｌｄ
Ｔｒｕｍｐ得以东山再起。今日，睇下Ｄｏｎａｌｄ Ｔｒｕｍｐ搞嘅嗰啲房地产项目同埋佢喺加州嘅豪宅，
都渗透住“风水”嘅影子。
不过我最欣赏嘅，系佢好似顾修全博士所讲噉样，适时宣传，做一个“推广人”——千方百计都要喺佢啲
标志性嘅建筑物冠以“Ｔｒｕｍｐ”之名，实行２４小时不间断噉卖广告；至于佢嘅私人豪华飞机、直升飞机
同豪华游艇就更加唔使讲；而佢亲自出演嘅真人骚节目《飞黄腾达》（Ｔｈｅ Ａｐｐｒｅｎｔｉｃｅ）更加
将佢嘅宣传攻势推到极致；而家更加推出咗以Ｄｏｎａｌｄ Ｔｒｕｍｐ为名嘅樽装水、杂志、哥尔夫用品、
服装……只要系“Ｄｏｎａｌｄ Ｔｒｕｍｐ”牌嘅，就系高品质，代表豪华，象征你尊贵嘅身份……
新一季嘅《飞黄腾达》喺上个礼拜再临明珠台嘞，亦都喻示住有好多周末嘅饭局会被我婉拒——呢个就系
Ｄｏｎａｌｄ Ｔｒｕｍｐ嘅魅力嘞！事实上，我就推咗今晚嘅饭局，准备专心致志噉同阿Ｄｏｎａｌｄ一齐
决定炒边个人。
话时话，我都好鬼憎嗰个Ｏｍａｒｏｓａ，并唔系因为我唔钟意黑人——我都未至于要好似某人噉要“将
黑人切片”，但我就觉得嗰个Ｏｍａｒｏｓａ真系好样衰，而且啲态度真系好难接受。我谂如果我都话难接受
嘅，要将佢哋切片嘅某人都一定接受唔到！
上个礼拜，嗰个专横跋扈、应该负主要责任嘅Ｏｍａｒｏｓａ居然冇被炒，反而美丽温驯嘅花花公子玩伴
女郎Ｔｉｆｆａｎｙ Ｆａｌｌｏｎ就因为善良而冇乜经验就成咗“替罪羊”。
不过又系嘅，Ｄｏｎａｌｄ Ｔｒｕｍｐ最后都畀咗句评语：“善良最终都系只能够返归嘅。”——冇错
嘞，喺呢个弱肉强食嘅世界里面，善良最终都系难逃邪恶嘅吞噬。所以，如果你唔想畀人食咗嘅话，最紧要你
就系要够强，噉啲食肉猛兽就唔敢埋你身——你几时见到啲狮虎豹狼会攻击健壮嘅公牛？佢哋一般只会追逐啲
老弱病残——呢个先系大自然嘅真正法则！
当然，Ｍｒ．Ｄｏｎａｌｄ Ｔｒｕｍｐ亦绝非善类。呢条赌场同地产嘅大鳄捞到今时今日，如果只系靠
奉公守法、克勤克俭嘅话，我谂，冇边个有钱佬真系可以发到达啰！
所有财阀大亨唔多唔少都有啲嘢嘅！不过喺啱开始嘅时候，啲人多数都唔会接受佢哋嘅态度、处事方式。
而嗰啲有潜质嘅人系唔会在意人哋点睇、点谂嘅，只会继续行佢哋认为啱嘅路，做佢哋认为啱嘅事情。到佢哋
成功咗之后，啲人就会“抛开”之前嘅所有成见，当佢哋神咁拜，又会主动为佢哋欢呼喝彩。Ｄｏｎａｌｄ
Ｔｒｕｍｐ以前曾经因为太过招摇过市，而一度被认为系美国最乞人憎嘅富翁。加上佢曝光率好高，钟意搞到
好似摇滚明星噉，次次出场都美女相伴，而且专同靓女名模传绯闻，娶亲嘅都系出名嘅美女名人——虽然最终
都系以离婚收场。
但系呢一切并无损阿Ｄｏｎａｌｄ嘅毫发，反而重加令佢嘅声名雀跃，喺生意场上无往而不利！今日，有
Ｄｏｎａｌｄ Ｔｒｕｍｐ出现嘅地方，就会听见欢呼声同掌声。无论你几唔认同佢嘅做法或者价值观都好，
你都会视佢为成功嘅典范，并且会想方设法同佢有深入接触，喺佢身上学到嘢或者攞着数。Ｄｏｎａｌｄ曾经
谂住用千几棵上等嘅棕榈树围住佢嗰间Ｔｒｕｍｐ国际哥尔夫俱乐部，于是佢去佛罗里达州中部见一位农艺园
嘅老板，嗰个大老世开价话要４０００文一棵，佢梗系嫌贵啦，农艺园主竟然肯割价求售，卖３００文一棵，
条件就系将Ｄｏｎａｌｄ Ｔｒｕｍｐ个名印喺佢嘅宣传册上，帮佢卖广告——结果当然系成交啦！死未？你
而家知道名气几值钱啦嘛！
真系好开心再见到阿Ｄｏｎａｌｄ重临明珠台，起码打落十个礼拜又可以同佢一齐审视啲人点样嘈交或者
互相推卸责任，人性嘅光辉与阴暗面都可以喺呢个真人骚节目里面表露无遗！
虽然我唔系好认同阿Ｄｏｎａｌｄ嘅一啲价值观同做法，例如佢嗰啲好奢华嘅生活、搞埋咁多嗰啲哥尔夫
球场——因为好唔环保，但系佢真系教晓咗我好多嘢！所以，就喺今日，佢牛一嘅时候，我要同佢讲声，祝佢
生日快活！
最后，我好高兴见到Ｄｏｎａｌｄ Ｔｒｕｍｐ家下进军埋教育界，开办埋学校添！除咗不时搞慈善事业
之外，阿Ｄｏｎａｌｄ重肯将佢嘅学识同经验教埋畀其他人——真系好！
