上个月，全中国，乃至全世界都关心四川汶川大地震。好多人都捐钱捐血捐物，帮手赈灾。

　　但问题系，今次受灾嘅又唔止四川一个地方，全国各地都有地区受到唔同程度嘅破坏影响，点解就见报纸
电台电视网站报道四川，而邻近嘅甘肃、陕西等，提都唔见有人提咁滞——唔通嗰啲地方就冇人被活埋？冇人
死伤？冇人需要救治同帮助？

　　以前啲女仔最钟意“考验”男朋友：“我同你阿妈一齐跌咗落水，但我哋两个都唔识游水，你会救边个先
啊？”嗱，呢个问题绝对系可以玩死人嘅问题——既可以玩死男朋友，又可以玩死个女仔自己，就睇你想唔想
玩死段情。所以最佳答案就系“救最近自己嗰个先”。于是就衍生出喺火场抢救人同财物嘅第一原则，就系先
抢救离出口最近嘅人同物。喺战争嘅环境里面，医生都唔可能抢救到每一个伤员，于是佢哋就只会尽可能抢救
嗰啲有抢救价值嘅伤员先，医返都嘥药费嘅就可能只会获派吗啡等死。

　　因此，我哋唔可以话四川地震受灾最严重，所以就要将所有嘅资源同注意力都集中到四川，因为其它受灾
嘅地区同样需要救助，同样需要重建！

　　而家问题又嚟嘞：超过半个月嘅连续降水，已经令岭南广泛地区水浸嘞——好多岭南同胞即使唔系喺火热
里面，都肯定系处于水深之中。请问你哋又有冇伸出援助之手呢？

　　与其话地震系天灾，不如话今次水浸先至系——因为啲水系从天而降嘅！而且啲岭南同胞较诸四川灾民有
过之而无不及！试谂下，四川灾民如今重有平地可踏，有帐篷栖身，啲受水浸影响嘅岭南同胞呢？佢哋又有冇
栖身之所啊？面对洪水就即系面对细菌病毒，我哋嘅岭南同胞所受嘅威胁有几严重啊？即使水退咗之后，受灾
嘅地方又可唔可以重建啊？又要几耐先可以重建得到啊？

　　上个月捐钱捐物可能捐到有啲人都荷包干硬化，噉想请问声，如果而家叫你哋再捐钱出嚟救助下我哋嗰啲
岭南同胞，你重有冇钱啊？你会唔会捐钱畀佢哋呀？对四川灾民就咁鬼阔佬，噉对岭南同胞又点呢？

　　有冇谂过，点解六月一号喺香港西九龙中天地举行嘅八个钟头筹款义演，号称出动咗中港台超过二百名嘅
艺人，并且由香港演艺人协会联合埋无线电视、亚洲电视、香港电台、凤凰卫视、新城电台一齐搞，但都只系
筹到唔够三千二百万？香港每年都有几个固定嘅慈善筹款晚会，例如欢乐满东华、星光熠熠耀保良、慈善星辉
仁济夜……四川噉样震一震，唔知嗰啲本来受惠嘅机构来年嘅经费又如何呢？

　　面对咁严重嘅地震同水灾，我哋重有冇必要将“性”火继续传递落去？奥运真系值得搞？唔通个天嘅指示
重唔够明显？重有，我哋岭南同胞曾经救助过嘅华东水灾地区、今年受雪灾影响过嘅岭北诸省嘅人（暂且唔计
四川）会点样对待今次嘅岭南水灾呢？系同情？救助？定系幸灾乐祸？



　　一年前不幸言中：如果广州发生水灾……