有读者来信问我，大肚婆血糖高点办？
呢个问题问得好，的确系好值得研究。
首先我哋必须认识一点：妊娠血糖高喺妇女怀孕期间同埋产后一段时期内都会出现，呢个现象虽然唔系话
好普遍，但系都算比较常见，我啲亲戚朋友里面都有人试过。呢个病——其实准确嚟讲，呢个现象应该称之为
“病征”，呢个只系“病征”，系一种现象，即系一种症状，唔算系一种病。不过完全唔理佢、忽视佢，又有
可能会演变成真正嘅糖尿病，因此绝对唔能够掉以轻心。但亦毋须过分紧张，因为好多有妊娠血糖高嘅妇女喺
哺乳期之后或者甚至喺哺乳期结束之前，呢种现象就会消失，部分产妇甚至唔知道自己有妊娠血糖高嘅现象，
所以大家真系唔使慌，无谓自己吓自己！
最佳嘅处理方法，首先第一样嘢就系要端正心态——妊娠性高血糖冇乜咁大不了，绝对系唔需要恐慌嘅！
大部分人系因为怀孕导致内分泌一时失调，所以先至会有妊娠性高血糖嘅现象出现。我曾经讲过，影响健康嘅
６大因素系因果业报、基因遗传、毒素、营养、脊椎、心理性格情绪。其中心理性格情绪占有好重要嘅地位。
而心理情绪系可以好容易调节嘅，只要我哋思想够正面同积极，噉你就算系有绝症都可以马上好返一半。所以
千祈唔好话太过担心，否则你可能唔止有妊娠高血糖，甚至产前抑郁同埋产后抑郁都有你份！因此我好鼓励啲
人大胆放心噉将自己心中嘅郁闷、压抑抒发出嚟——有乜嘢就讲出嚟，唔好摆喺自己心里面。记住：如果有人
帮你分担，你嘅苦痛系可以减半嘅！
解决咗心理问题，跟住落嚟就系饮食营养问题嘞。由于而家啲人嘅饮食以精细甘美为主，因此就会好容易
搞到自己唔掂——糖尿病就系因为食得啲肥腻幼细嘅嘢太多而导致嘅病。所以一定要喺饮食上控制先可以解决
呢个问题——首先，当然就系要少食多餐啦；其次就系要拣啲粗粮嚟食，再次就系要配合埋啲新鲜嘅蔬菜瓜果
一齐嚟食。
讲到粗粮，医糖尿病首选就系荞麦。而家喺广州地区，乃至广东省内都比较容易买得到荞麦或者荞麦做嘅
产品——其中以苦荞麦嘅效果较甜荞麦为好。荞麦系中国古代重要嘅粮食作物同救荒作物之一，因为佢适应性
强，生长期短，容易栽种，而且系一种耐饥抗寒嘅食品。由于荞麦含有大量嘅生物类黄酮（特别系维他命Ｐ）
同埋微量元素（例如铬），对于降低胆固醇同血糖好有效，而且冇副作用。
作为主食，稍逊于荞麦嘅就系粟米。粟米所含嘅不饱和脂肪酸可以降低血清胆固醇，纤维素可以降低人体
对胆固醇嘅吸收，可以防止高血压同冠心病，加上粟米嘅防癌作用，所以，粟米系世界公认嘅“黄金作物”。
而且粟米可以吸收人体嘅一部分葡萄糖，对糖尿病具有缓解嘅作用。
再次就系小米嘞——小米又名谷子、稷子、黄粟、籼粟、硬粟、粟谷、粱米、粢米等，我哋平时会叫佢做
“黄米”。小米嘅营养价值其实并不亚于大米，系我国北方地区嘅主要粮食之一。经常食用陈小米饭可以治疗
到糖尿病。小米具有滋阴养血嘅功效，系产妇非常之好嘅保健食品。
此外，红米同糙米都系好有益嘅！有时不妨去买啲唔同嘅谷物返嚟，煮下八宝饭或者煲啲五谷粥都得——
不过煲粥唔好煲太耐，同埋唔好将啲粥煲到好似米糊噉样，因为噉样嘅粥对你嘅血糖冇乜好处！
讲完啲主食，跟住就讲下啲大豆——即系黄豆嘞。黄豆含有人体必需嘅８种氨基酸，另外重含有谷氨酸同
天门冬氨酸，以及婴儿必需嘅组氨酸。黄豆嘅Ｂ族维他命、矿物质、微量元素都好丰富。而黄豆嘅脂肪酸同埋
大豆卵磷脂就更加唔使讲嘞，系调节内分泌嘅重要物质。将黄豆制成豆腐之后净低嘅豆腐渣含好少热量，但系
蛋白质含量高，而且富含钙同食物纤维，对糖尿病患者同肥胖症患者嚟讲，都系一种非常之唔错嘅食品。
另外，不得不介绍嘅就系魔芋嘞——魔芋含有１７种氨基酸同埋胆碱。胆碱系乙酰胆碱嘅前体，亦系各种
神经细胞嘅重要传递物质之一。实验证明乙酰胆碱可引起肝糖元含量增加，由于葡萄糖变成肝糖元贮存起嚟，
因而令到血糖唔会升高，从而降低血糖。此外，魔芋中嘅魔芋甘露聚糖分子量大、粘性高，可以延缓葡萄糖嘅
吸收，有效噉降低咗餐后血糖，从而减轻胰脏嘅负担，使糖尿病患者处于一个良性嘅循环，唔会好似某啲降糖
药物噉样令血糖骤然下降而出现低血糖嘅现象。同时，因为魔芋甘露聚糖嘅吸水性强、含热量又低，既能增加
饱腹感，减轻糖尿病人嘅饥饿感，又可以减轻到体重。而且魔芋重具有抗菌消炎嘅治疗作用，对产后嘅恢复同
保健都好有好处。一般我哋去购买素食产品嘅时候都好容易会见到用魔芋嚟制造嘅食品。
跟住会讲下白萝卜。白萝卜可以帮助消化、防癌、抗癌、杀菌……喺我国嘅民间素有“小人参”之称，我
就唔一一赘述嘞。主要系想讲一条食疗方——将白萝卜榨汁，然后用嚟煲粥，可以医治妊娠性血糖高。
红萝卜虽然唔适宜同白萝卜一齐食用，但原来红萝卜里面所含嘅丰富果酸有利于糖嘅代谢，具明显嘅降糖
作用，而且生食嘅效果更佳。唔好以为红萝卜比较甜，就唔适宜糖尿病患者食用，实际上红萝卜本身嘅甜味系
佢固有嘅特性——红萝卜所含嘅碳水化合物其实只有７．７％，民间常用嘅单方之中都有提及：医糖尿病，将
红萝卜当生果食。红萝卜重具有杀菌、抗过敏、抗炎症、防治高血压、增进人体免疫力嘅作用，而红萝卜含有
嘅胡萝卜素可以喺人体内转化成维他命Ａ，既有益于维护皮肤嘅健康，又能防治夜盲症同干眼症，对婴儿眼睛
嘅发育好有帮助。喺提倡母乳喂哺嘅今日，各位妈咪又点可以走宝呢？
然后就讲下啲瓜类。首先系南瓜。南瓜含有大量果胶，同淀粉类食物一齐摄入嘅时候，可以提高胃内容物
嘅粘度，并且调节胃内食物嘅吸收度，使碳水化合物嘅吸收减慢，因而推进胃内食物排空。同时，果胶又会喺
肠道里面形成一种凝胶状物质，使消化酶同营养物质嘅分子唔能够均匀混合，延缓肠道对营养物质嘅消化吸收
——从而控制餐后嘅血糖上升。南瓜所含嘅元素钴，可以增加体内胰岛素嘅释放，促进糖尿病患者嘅胰岛素嘅
正常分泌，对于降低血糖具有良好嘅效果。南瓜可以消炎，重有防治结石、便秘、溃疡、防癌、抗癌等作用，
而且可以补锌——所以我哋尤其是唔好放过南瓜籽！
苦瓜，以往广东人多数都会叫佢“凉瓜”，因为佢性寒味苦，有消暑、明目、止渴、解毒、补益等功效，
“凉”同“良”系同音——点都好过“苦”嘛！苦瓜里面含有一种类似胰岛素嘅物质——多肽－Ｐ，可以降低
血糖，而且无毒副作用。
唔知大家知唔知，原来冬瓜系具有减肥作用嘅。冬瓜内含嘅葫芦巴碱同丙醇二酸，能有效噉阻止机体中嘅
糖类转化为脂肪，重可以将肥胖者体内多余嘅脂肪消耗晒，有助于防治高血压、动脉粥样硬化同肥胖症。所以
我通常都好鼓励啲人将冬瓜当饭噉食嚟减肥，真系好使得！淮山同冬瓜一齐煮，唔单止可以医妊娠性高血糖，
而且重可以补中益气，对产后女士收身好有效！
钟意食西餐或者西式煮法嘅人不妨选择下洋葱。洋葱除咗可以杀菌同埋抗癌之外，佢所含有嘅硫化丙烯、
硫醇、Ｓ－甲基半胱氨酸亚砜等成分就具有降血糖、降血脂嘅作用。尤其是洋葱中嘅磺脲丁酸，可以通过促进
细胞对糖嘅利用而有效降低血糖。不过如果啲洋葱煮得太耐嘅话，上述嘅成分（多数属于油脂性挥发液体）就
好易会挥发晒，从而失去降血糖嘅功效。所以对于糖尿病人嚟讲，生食洋葱效果最好，佢哋可以整沙律，或者
用醋嚟腌洋葱。
如果嫌麻烦嘅，可以用蒜头。蒜头杀菌、抗癌、提高免疫力、降低血压同埋胆固醇水平等作用就好多人都
知，但原来蒜头能够影响肝脏中糖元嘅合成，降低血糖水平，并且提高血浆内嘅胰岛素水平。因此平时煮餸嘅
时候，不妨落多啲蒜头。下次出街食饭嗰阵，应该将芝士焗西兰花改为蒜蓉炒西兰花、上汤大芥菜改为蒜蓉炒
芥菜，或者蒜蓉蒸胜瓜。
再有就系推荐蘑菇同埋番茄。呢两种嘢有几好，相信唔使我多讲嘞，总之佢哋对降低血糖都有好处啦！我
周不时都会食呢两种好嘢！
至于生果方面，其实亦唔使太过忌讳嘅，只要尽量拣啲糖分冇咁高，或者比较酸嘅，噉就冇乜问题啦！
有条民间验方：系将荔枝核焙干，然后磨成粉，每日食１０克左右。不过呢个方法比较麻烦，相信都冇乜
人肯试。
另外就有个汤：菠菜根９０克洗净摆落滚水里面焯两分钟，跟住捞起切碎，然后同１０克鸡内金一齐煲佢
半粒钟，饮汤食渣，可以治疗妊娠性高血糖。如果加多１１０克菠菜根、３０克淮山、６０克米，重可以煲番
个菠菜根粥，一样咁有功效！唔知“鸡内金”为何物嘅，去鸡档问下啲鸡佬就知咖嘞！
以上食疗并非大肚婆或者产妇先至食得，基本上所有嘅糖尿病患者、肥胖症病人，同埋健康人士，都可以
食得——正所谓“有病治病，冇病就强身！”不过记得唔好成日食死一样，要经常变换下唔同嘅花款。
无论系大肚婆抑或产妇，都应该要有适量嘅运动。因此我建议各位妈咪不妨试下做瑜伽——运动量唔大，
但系效果显著，既可以提气，又能够调节情绪，重收埋身添……真系一举几得！嗰啲咩“妊娠血糖高”之嘛，
使乜惊佢噃？！
最后，祝各位疑似或者真系有妊娠高血糖嘅人士，血糖早日回复正常水平，晚晚都高枕无忧，ＢＢ就健健
康康、快高长大！
有咩健康方面嘅疑难问题，欢迎随时来信垂询或者讨论！
大肚婆嘅饮食宜忌原则及营养摄取建议 （一）
大肚婆嘅饮食宜忌原则及营养摄取建议 （二）
大肚婆嘅饮食宜忌原则及营养摄取建议 （三）
