继６月１６号美国加州宣布承认同性恋婚姻之后，１７号挪威人亦都投票通过咗允许同性恋结婚嘅法律。
而到目前为止，比利时、加拿大、西班牙以及荷兰都系承认同性恋婚姻嘅。对呢两个消息，我系表示欢迎嘅！

　　我对同性恋向来都唔厌恶嘅。两个人只要系真心钟意对方，噉喺埋一齐又有咩问题呢？起码我觉得同性恋
系两个人嘅事，基本上唔会影响到其他人，噉又有乜必要妨碍、阻止佢哋嘅交往、结合呢？

　　其实同性恋古已有之，如果唔系，噉又点会有“龙阳泣鱼”、“断袖分桃”、“娄猪艾豭”、“磨镜”、
“鄂君绣被”、“邓通造币”、“对食”……呢？

　　喺自然界里头，动物嘅生殖器官只系为咗繁衍后代而使用嘅，但人类嘅生殖器官除咗用嚟繁殖生育之外，
重可以爱嚟追求刺激同快感，仿如一件玩物噉样。你有冇见过啲动物系以欣赏、偷窥、玩弄……生殖器官为乐
嘎？我谂应该就冇嘞，即使有，都系极个别嘅啫，唔似得人类咁广泛咁大规模！

　　但有一个问题，喺人类社会里面似乎就存在一种“潜规则”——男人就应该同女人玩呢个快乐游戏，女人
就应该同男人玩呢个快乐游戏，如果男人同男人玩呢个快乐游戏或者女人同女人玩呢个快乐游戏，就会被视为
“异端”、“怪物”、“变态”……点解会噉样嘅呢？

　　有科学研究指出，男性喺出生之后成为同性恋嘅几率为２％——看似比例唔高，每５０个男人里面先至得
嗰一个，但如果用嚟乘下总人口……哇，嗰个数字都几可观下！如果计埋女性方面，噉就更加不得可了！

　　既然系有一个咁庞大嘅人群，噉就唔可以作为一个小问题嚟睇嘞！点解唔可以将同性恋嘅婚姻合法化呢？

　　我觉得将同性恋婚姻合法化有三大好处。首先就系可以令社会安定——社会唔稳定，存在争詏，就系因为
有啲人嘅权益被漠视或者被剥夺，只要佢哋取得自己想要嘅嘢，冲突自然就会减少好多。其次就系可以令人口
问题得到缓和——基本上同性恋者都系唔可以或者唔会生育嘅，佢哋多数都系ＤＩＮＫ，噉就可以令到出生率
喺某程度上降低，人口激增所带嚟嘅种种问题亦都可以随之而减少，甚至乎系得以解决。第三就系可以令税收
增加——如果同性恋婚姻合法化，必定会有好多同性恋者注册结婚，势必带动婚礼消费；同时，同性恋者毋须
再为自己嘅性取向受人歧视责难，可以专心致志噉工作，对社会嘅贡献亦都肯定唔会少！

　　喺性工作合法化嘅地方，强奸、非礼嘅罪案就得以大幅度减少，因为人嘅需要问题解决咗，政府嘅库房又
多咗收入——呢啲就系我哋古人所讲嘅“因势利导”嘞！

　　所以，各位，解放下你哋嘅思想啦！将同性恋婚姻合法化系冇乜嘢坏处嘅！

　　不过，虽然我支持将同性恋婚姻合法化，但系各位同志千祈唔好打我主意！