闻说听日（即系６月２６号），广州市政府搞咩领导接待日之类嘅形象工程，香港嘅《明报》更称此举为
“公开接受民众请愿”。
不过老实讲，我对于呢啲所谓嘅领导公开接访并唔睇好——点解？唔使问点解啦，系嘛？大家都有眼睇咖
啦！如果系都要问点解嘅，唔该查下举报安徽阜阳“白宫”嘅李国福，你就知道咩叫“冚家铲”嘞——在此，
我要不厌其烦噉再次重申：“冚家铲”并唔系粗口，只可以讲系咒语，就好似你话人哋“仆街”噉。
所以呢啲咁假嘅所谓“民主”、“请愿”……我系唔会去参与嘅，免得“出师未捷身先死”。噉讲并唔系
因为我怕死，而系“知其可为而为之，知其不可为而待之”——懂得进退嘅人先至系做大事嘅人。
闲话休提，言归正传，讲返听日个“骚”——我就一定唔会去咖嘞，但系唔代表我冇意见要讲，所以如果
边位会去晒命，或者系有乜嘢渠道可以“上达”嘅，不妨攞我呢啲难题去叩问一下诸位广州市领导，睇下佢哋
嘅能力有几强，对市民有几热爱，思想有几解放……
第一，请问各位领导，喺我上访提意见／建议嘅时候，可唔可以唔查身份证，唔填表，唔影相，唔好攞个
镜头嚟对住我？你知道啦，我咁鬼靓仔，等阵上电视、登报纸，抢咗你哋嘅镜就唔好啦嘛！重有啊，我惊啲女
都因此纷纷爱上咗我，搞到我应接不暇，噉就唔好啦！
第二，请问广州市长，你哋嗰条咩“市长热线”——即系“１２３４５”几时会设置广州话呢？须知道，
“广州话”先系广州市嘅地道语言，并唔系所有人都识普通话或者钟意听普通话，所以喺你哋嘅语音系统里面
设广州话系好应份、好有必要嘅事！你唔好同我讲乜鬼全国推广普通话，唔系有人口口声声话推广普通话唔系
要消灭其它语言咩？噉唔该你哋做畀我哋睇下，睇下你哋系咪讲就一套，做就另外一套！
第三，请问各位领导，你哋几时先会取消对外地人嘅一系列嘅优惠政策？唔该你哋搞清楚，你哋系为边个
服务先！系为广州人服务，还是为外地人服务？国务院同埋党中央将广州市交托畀你哋，将广州人交托喺你哋
嘅手中，你哋做咗啲乜嘢？学温总话斋：“是人民在养你们，你们看着办吧！”——系我哋广州人养紧你哋，
而你哋对我哋广州人又做紧啲乜嘢？有几多嘢真系对我哋广州人系有好处嘅？唔好同我讲咩外地人对广州作出
几大贡献，做完嘢唔使出粮嗰啲先好讲“贡献”，否则都系“废话”！重有，咁钟意讲“贡献”，点解唔返去
自己乡下“贡献”、造福桑梓？系都要走去人哋嘅地头先作“贡献”？
第四，请问各位领导，你哋打算点样节约、环保？家下能源咁紧张，又要讲求环保，你哋今个夏天系唔系
会继续开住空调、叹住冷气嚟办公呢？
第五，请问各位领导，你哋谂住点样响应中央话要压缩办公开支嚟支援灾区重建嘅号召呢？家下岭南都系
灾区嚟噃，上头又冇乜点表示，你哋又谂住点样帮助啲灾民重建家园啊？
第六，请问各位领导，你哋有冇谂过公开一下你哋自己嘅收入、资产、家属嘅社会关系……等资料，以示
你哋嘅身家清白、你哋廉洁奉公、你哋遵纪守法？
第七，请问各位领导，你哋对于自己决策上嘅错误系采取点样嘅态度嚟处理嘅呢？系千方百计掩饰，还是
将错就错，抑或勇于认错但永不改过，定系……
第八，请问各位领导，好似有线数字电视呢啲噉样损民利官嘅玩意，系由得佢继续错落去，定系当机立断
停止咗佢，等技术同条件都成熟咗先再推出呢？
第九，面对本地日益高企嘅失业率、人口爆棚、治安等问题，广州重应唔应该引进所谓嘅“外来人才”？
广州重有冇必要建多几个“大学城”——既系浪费、破坏咗农地，又污染环境，重损害咗本地人嘅整体利益！
第十，请问各位领导，你哋以前积集落嚟问题、承诺过嘅事，究竟几时先解决？唔使讲第样，我就系想问
一下市长张广宁，大学城小谷围郭朗村嗰一班村民，你谂住点办？你自己曾经亲口承认过，系政府对佢哋唔住
——系唔系一句“对唔住”就可以解决晒所有问题？
查实，要广州市领导回答嘅又岂止呢十个问题！不过如果呢十个问题都答唔到，或者答唔好，答咗就等于
冇答嘅话，其它咩问题都系废嘅，各位唔使慌佢哋会畀到啲咩满意嘅答复畀你哋嘞！呢班人肯定就系——讲就
天下无敌，做就唔知有冇能，但就可以肯定系无力！
大家拭目以待，睇下听日嘅电台、电视、网络、后日嘅报纸点样对呢班广州市领导歌功颂德啦！
