旧年有日瞓醒收到条短信：“我发梦梦见自己怀孕５个月啊。”呵呵，噉恭喜晒嘞！
一般嚟讲，怀孕呢家嘢系女性专利，如果男性梦见自己大肚嘅话，噉就麻烦嘞，因为可能会涉及到财物嘅
损失。但如果系女性梦见自己怀孕，一般嚟讲多数都系预示幸福同物质财富嘅增加，但呢一点又唔系咁绝对。
譬如，结婚多年未能怀孕嘅妇女梦到自己怀孕，多数都系“日有所思，夜有所梦”嘅充分表现，发个噉嘅梦好
正常，系一种心理上嘅补偿，但其实亦都系想话畀梦者知，佢应该尽量放松自己，否则对佢自己或者怀孕都冇
好处。如果系已经有细路嘅妇女梦见自己怀孕，就两睇嘞：一系佢而家环境好好，家庭好幸福；一系佢啱啱好
相反，可能佢老公疏忽咗佢，令佢好想返到啱结婚嘅时候，怀念蜜月期间嘅温馨。
但问题系，发呢个梦嘅Ｂ女重云英未嫁，尚待字闺中，噉就唔可以按以上嘅讲法嚟解画嘞！未拍拖嘅女仔
梦见自己怀孕，如果个梦境系快乐嘅，说明佢真系好想得到幸福嘅爱情，平时羡慕人哋嘅同时，喺潜意识里面
都会有“如果系我噉就好嘞”嘅谂法，所以就会喺梦里面体现出嚟；但如果个梦境系唔开心嘅，噉可能佢最近
就会遇到一啲麻烦事，令佢无所适从。恋爱中嘅女仔梦到自己怀孕，如果快乐即系会幸福不断，但如果系烦紧
自己点解会大肚嘅话，噉就应该检讨一下自己嘅生活方式同行为嘞！
Ｂ女一话畀我知，佢发个噉嘅梦，我就知道实系好事，一般人可能唔知点解，但好似我卢总咁鬼醒嘅人，
一谂就知系乜嘢事啦！解梦呢家嘢唔系攞本《周公解梦书》或者佛洛伊德嘅《梦的解析》睇下，就可以摷得到
答案嘅，一定要结合埋实际情况，发掘下潜在嘅暗示信息，噉先能够将个梦解释得清晰、透彻，梦主先会明白
点解会发个噉样嘅梦，同埋跟住落嚟应该点做。
从个梦表面上睇，Ｂ女可能系渴望有段好美好嘅爱情，但我知道呢个梦一定唔系讲呢样嘢。为咗证实我嘅
判断冇错，我就好详细噉问咗Ｂ女有关个梦里面嘅所有嘢。果然不出所料，个梦嘅暗示的确系另有所指。
Ｂ女当时忆述话，佢好突然噉发现有咗５个月嘅身孕，于是就走返屋企同屋企人讲。佢阿妈话，如果佢系
谂住读书嘅话就要将个ＢＢ落咗佢，如果唔系就会好麻烦。Ｂ女阿爸嘅反应同佢阿妈就好唔同，好似好鬼开心
噉样，可能系恨抱孙，一啲责怪佢嘅意思都冇。搞到阿Ｂ女都唔知点算好，于是佢就开始数手指——计下重有
几耐生得。数下日子，啱好同考试同埋嗰一日。然后阿Ｂ女就谂系考试先，定系生咗先？或者上昼生完下昼去
考试？抑或大住个肚去考试，考完试再去生……呢样唔得，嗰样又系唔掂，心急如焚之下就噉一下子扎醒咗。
听完阿Ｂ女讲佢个梦，我马上就话恭喜佢嘞。Ｂ女好奇怪，问我恭喜啲乜。我话恭喜佢个考试一定会成功！
原来Ｂ女嗰阵正进行紧一个好紧张嘅复习，准备参加今年嘅一个考试。但个问题系，阿Ｂ女平时嘅成绩都
唔算得话好好，佢一直都好担心自己可唔可以顺利通过考试。而呢个梦就暗示咗，如果冇乜意外嘅话，佢可以
顺利通过考试，取得佢想要嘅嘢。
噉点解呢？原来喺阿Ｂ女发呢个梦嘅时候，距离个考试大约重有四个几五个月时间，按照怀孕时间推算，
如果打后冇咩意外嘅话，Ｂ女就会生嗰个ＢＢ出嚟，从此就过上另外一种新生活。所以，我就噉同阿Ｂ女讲：
“你唔使担心自己嘅成绩嘅，只要你畀心机去温习，到时到候，个ＢＢ就会出世，而你嘅成绩一定会过关！”
阿Ｂ女听我噉讲完，都系有些少半信半疑，问系唔系真咖。我就同佢讲，一定系真嘅！点解呢？因为无论
你最后系早产、难产定顺产，只要系捱够时间，中途唔好出错，导致到小产，噉你最后都系会得到一个ＢＢ。
而呢个ＢＢ就系你新生活嘅开始，佢会带畀你新嘅希望！所以，你呢一次考试一定掂硬，根本唔需要担心！
阿Ｂ女听我噉解释，马上放下心头嘅大石，当堂就觉得个人轻松咗好多，话承我贵言。佢重话会继续努力
落去，就算几难几辛苦，都绝对唔会话放弃嘅！
……
寻日中午，我收到Ｂ女发过嚟嘅短信：“啱啱收到录取通知书！”
