继今个月较早前喺钓鱼岛附近地区撞沉我台湾渔船“联合号”之后，啲日本仔今日又有新搞作嘞——就系
通宵扣查我香港合法居民长达１６个钟头嘞！
香港民间组织“独立媒体”兼“本土行动”３名成员朱凯迪、周思中同陈彦楷２６号喺日本东京成田机场
入境嘅时候被当地出入境官员扣留问话。三个人喺今日中午获释，并获批３０日入境签证。日本出入境部门冇
解释到扣查与及释放３个人嘅原因，而且喺成个扣查嘅过程当中，３人嘅行李被全数没收，又冇提供任何食物
以及饮品，而且又唔畀佢哋打电话向外界求助。日方原本决定唔畀３人入境，理由就系佢哋嘅行程唔够详细。
一直到今日中午先突然改变咗态度，估计系同“独立媒体”预先约定采访嘅日本议员从中斡旋有关。而出入境
部门官员只系以简单英文表示，喺八国峰会举行之前，当局会比较小心谨慎。官员未有对３个人往后嘅行动有
任何劝吁，释放亦冇任何附带条件。
据悉，除咗佢哋３个之外，另外有一名来自美国，出席非官方论坛嘅讲者，及一名独立媒体记者同样遭到
日本出入境部门扣查。
“独立媒体”网编辑叶荫聪表示，佢哋３个人过关时被扣查问话，查询到日本嘅原因，到２７号朝早重未
获释，组织就向港府方面求助，要求驻日当局协助佢哋顺利入境。但系香港入境处回应话，未收到有关港人嘅
求助。佢强调，国际间有出入境自由，从事和平活动唔应该受到限制。“独立媒体”事前已经喺Ｇ８传媒网页
登记，觉得今次事件极唔寻常，认为三个人有权入境及进行合法报道。“独立媒体”原本打算派七人到日本，
计划趁日本举行八国高峰会议，到日本采访报道保育同劳工议题，并且拍摄纪录国际反对高峰会嘅示威情况。
其余四名记者是否成行，要视乎情况。
香港入境处强调港人有出入境自由，入境处唔会干涉任何人出境，被问及入境处曾否向日本当局提供香港
出席Ｇ８会议人士资料，入境处就话暂时未能回应。立法会保安事务委员会成员涂谨申指，若果香港人喺外国
遇上困难，政府必须给予高度嘅协助，保障市民合法权益；若果喺外国被无理拘留或逮捕，中国大使馆应展开
营救。日本驻港总领事馆寻晚就冇人出嚟回应查询。涂谨申又话，国际间有情报交流协约，如果属恐怖分子，
刑事机关应将有关人等资料给予别国；但若不涉违法行为，而政府部门将有关个人资料告知海外，将佢哋当成
恐怖分子，就即系抹黑紧自己嘅公民，情况就等如出卖公民一样，“喺民主国家就要有官员落台”。
睇返今个月中港大女学生陈巧文喺澳门嘅遭遇，加埋日本军舰撞沉台湾渔船至今都重未有咩表示，睇嚟，
今次嘅事件最后都系不了了之。惟盼“独立媒体”嘅成员今次拍摄采访顺顺利利，唔好出啲乜嘢差错，离境时
唔使再畀人留难就还得神落嘞！
今次一年一度嘅八国（Ｇ８）高峰会议将会喺下个月嘅７号（“卢沟桥事件”纪念日）喺日本札幌举行。
出席嘅成员国包括美国、英国、法国、德国、日本、意大利、俄罗斯同加拿大，虽然中国并非成员国，但国家
主席胡锦涛过去几年都有出席呢个一年一度嘅高峰会议，今年亦计划喺７月上旬前往札幌。
中国啱啱先同日本喺东海油田嘅问题上，达成某部分嘅协议，啲萝卜头就开始咁嚣张，根本就冇将我中国
香港特别行政区嘅合法居民放在眼内。睇嚟，可能真系“因为畏缩与忍让，人家骄气日盛”嘞！不过我谂内陆
嘅“进步人士”同样唔会在意香港人喺国外遭遇到啲咩，最多系佢哋有难嘅时候就希望港澳台、岭南同胞可以
伸出援助之手，帮佢哋度过难关嘅啫！所以，各位同人，我哋都系自求多福好过喇！冇人会帮我哋！冇人可以
帮得到我哋咖！睇下最近岭南水灾就知道啦！
有时我又喺处噉谂嘞：如果呢啲噉嘅冲突可以导致呢届奥运会开唔成，同时又唔会有人因此而断送性命，
噉呢啲矛盾系唔系就……
