肥雄牛一，发条短信恭贺下佢啦，佢回复我：“多谢！你居然会记得我生日。”

　　真系畀佢激亲，连随就复返佢嘞：“唔使客气！今晚请食九大簋就得嘞！不过你竟然用到‘居然’呢个词
就颇令我汗颜！我一向都记得咖啦！唔信查下旧年嘅记录。”肥雄又问最近有咩大事件要我出马，我就答佢，
如果佢请食九大簋就要我亲自出马。我重话今日如果有时间嘅话，就写篇文畀佢。噉家下叫做都有些少时间，
噉就写几句啦。所以今日呢篇文系特别送畀肥雄嘅！

　　今日想讲嘅嘢，其实都好简单，系我一啲体会。最近啱啱同一个女人－－因为佢已经嫁咗人，所以绝对系
个女人，同个女人合作完成咗件事，发觉有啲嘢原来真系女人先至会擅长嘅，呢个就系理顺缠绕不清嘅线嘞！
面对一捆大兜乱嘅绳，佢哋居然可以轻而易举就噉知道如何拆解，实在系令我佩服！

　　睇返现实，如果将啲复杂嘅男女关系比作系一堆缠绕不清嘅线，女人喺处理上绝对系会比男人优胜！佢哋
唔会好似男人噉优柔寡断，难以取舍，佢哋作决定嘅果断同决绝，亦绝非男人可比！

　　唔止一个人话过，齐人之福唔易享——无论系以前三妻四妾嘅封建时代，抑或今日呢个自由开放嘅社会。
同一套戏你可能要睇两次以上，同一番说话你可能要讲两次以上，就连食餐饭都可能要食两次……无时无刻都
要小心提防，以免自己发开口梦嘅时候唔觉意将个秘密爆咗出嚟。电影《双食记》就系警告嗰啲一脚踏两船嘅
男人要谂清楚个后果，如果唔系嘅话，越快乐就只会越堕落！

　　相反，若果女人系要一脚踏几船，将啲男人玩弄于股掌之中，对佢哋嚟讲亦唔系咩难事。有时佢哋唔觉意
陷入多角关系之中，亦都好容易抽离，并且好快就揾到解决办法。

　　所以，男人唔好轻易玩多角游戏。如果唔好彩真系畀你遇到一啲纠缠难解嘅绳结，除非你有亚历山大帝嘅
气概同才能，否则，呢啲问题都系交畀啲女士去处理为上——因为佢哋比较擅长！

　　今日，查实重系一个靓女嘅牛一，Ｒｏｓａｎｎｅ啲靓相稍后再补上！