而家呢个时候，无论系喺美国嘅西岸定系东岸，都依然重系７月４号－－美国嘅“独立日”，即系美国嘅
“国庆节”。美国人今年总算安然度过咗呢个国庆，拉登或者其它“恐怖主义组织”并冇对美国本土或美国驻
海外嘅机构、设施、人员等进行袭击，就连曾经被布薯仔列为“支持恐怖主义国家”嘅北韩都喺日前公开将喺
宁边嘅核设施冷却塔炸毁——呢铺真系揾戏嚟做，布薯仔真系“饮得杯落”嘞！

　　不过呢个礼拜，北京嘅地铁就要全面实施安检。每个站都配备Ｘ光检测机、手持金属探测器、液体检验仪
同埋爆炸物检验仪，有啲站重有警犬，全天候巡逻，大件行李必检，细件抽查。枪支弹药、管制刀具、易燃、
易爆、放射性、毒害性等八大类可能影响公共安全嘅物品一律禁入，轻者劝离，重者大镬，包冇甩拖！

　　喺我嘅印象中，外国都好似未试过咁鬼大阵仗，乜解究北京要咁鬼夸张呢？咪就系为咗嗰个我哋有份畀钱
搞但就冇权利睇嘅“北京奥运”啰——记住，只系“北京奥运”，唔系“中国奥运”，更加唔系“世界奥运”
或者“国际奥运”。两公婆同床都可能异梦，同一个世界又点可能同一个梦想？所以，我就觉得“北京奥运”
好虚，劳民伤财，正一系阿茂整饼——冇嗰样整嗰样！

　　呢个世界自从有咗唔同嘅利益，跟住就有埋唔同嘅政见。然后为咗“利益”，于是就有连年不断嘅争战。
开始嘅时候系明刀明枪，但系跟住落嚟发现，原来有好多方法可以唔使明刀明枪，可以兵不血刃，亦可以唔使
付出咁沉重嘅伤亡代价，一样能够达到目的，于是有人就将呢啲经验、方法总结，称之为“兵法”。中国比较
出名嗰部叫“孙子兵法”——全世界都研究，并应用喺日常方方面面。

　　国家同国家之间开战就讲对战，而利益集团之间嘅暗战，就唔知应该叫乜嘞！美国话拉登发动“９１１”
事件系发动“恐怖袭击”——噉唔知美军攻打阿富汗、伊拉克等国又应该叫咩呢？对于阿富汗、伊拉克嘅人民
嚟讲，美国嘅军事行动又何尝唔系“恐怖行动”呢？！西方国家企图强加于其它宗教国家嘅价值观、生活方式
同利益，对人哋而言，唔通就唔系“恐怖活动”咩？！

　　喺呢个日日好多人要求多元化，但实质就推行紧“大一桶”嘅社会里面，好多表达唔到声音嘅人一定唔会
放过成为世界焦点嘅机会——预期，如果嗰个“北京奥运”真系开得成嘅话，实会有人搞搞震。至于用点样嘅
方式搞，噉就真系好难讲——地铁，相信系佢哋比较钟情嘅对象，所以北京市政府要对北京嘅地铁实施安检系
可以理解嘅！

　　但问题系，喺《孙子兵法》风行世界、流通国际嘅今日，重有边鬼个咁笨实走去搞北京呢？要搞不如搞下
其它保安冇咁严密嘅地方好鬼过啦！即系例如好似香港、广州、深圳、天津、上海、南京、重庆、武汉、成都
同埋台北、高雄都有地铁行紧，搞呢啲地方唔好过北京？

　　嗱，我噉讲并唔系话想教精啲“恐怖分子”，而系想提醒嗰啲当政者应该要小心防范，唔好等亡羊之后先
嚟补牢！狗官六本木管治嘅地方最近搞出嚟嗰单暴力事件，说明咗问题啦！我信呢个世界系有因果报应嘅——
嗰只仆街狗官六本木以前所作嘅孽，迟早有一日系要还嘅，数目一定唔细，今次只不过系收返小小嘅利息啫！
所以嗰啲别有用心嘅小人唔好谂住砌我生猪肉！

　　为咗我哋呢个社会可以继续稳定繁荣，人民可以乐业安居，我建议全国地铁一齐安检，唔好畀恐怖分子有
可乘之机！既可以创造ＧＤＰ、提供就业机会，又可以建设文明、营造和谐气氛……一举几得，何乐而不为？

　　不过我都系奉劝各位，今年七八月份，冇乜事，非必要都唔好搭地铁！如果系非搭不可嘅，尽量拣啲唔系
咁繁忙嘅时间、唔系咁多人嘅车站，而且要尽可能快入快出，唔好喺地铁里面逗留得太长时间！因为以前都有
广告话啦：“搭地下铁路，话咁快就到！”