今日七月七号，问过若干个人，基本上都记得今日咩日子－－７１年前日本借口喺北平西南嘅卢沟桥附近
演习嘅时候，一名士兵“失踪”咗，要求进入宛平县城搜查，遭到中国守军第２９军严辞拒绝，日军遂向中国
守军开枪射击，又炮轰宛平城，第２９军于是奋起还击抗敌，呢个就系震惊中外嘅七七卢沟桥事变。日本帝国
主义全面侵华战争就系从７１年前嘅今日开始嘅！

　　一出世就有“白雪公主”之称嘅许慧欣有首歌叫《七月七日晴》，本来应该几啱今日听嘅，不过偏偏今日
个天就唔系晴天，所以今日个题目就系《七月七日唔晴》。

　　噉今日点样“七月七日唔晴”法呢？首先，今日落咗好几场雨——由凌晨两点几三点就开始落嘞，一路到
下昼两三点断断续续系噉落，有大有细。所以，今日绝对系“七月七日唔晴”！

　　其次，今日Ｇ８高峰会议喺日本札幌洞爷湖举行，话会集中讨论全球气候暖化、高油价同通胀等问题，但
会议又话将会通过联合宣言，加强各国合作发展核能，减少对石油嘅倚赖——究竟佢哋系想发展能源，定还是
发展核武？抑或帮恐怖分子研制新武器？Ｇ８重要拉埋中国同印度落水，促请两国加快核能发展同埋减低对于
石油产品嘅补贴。

　　今次八国高峰会议将会花费日本政府６００亿日元（约５．６５亿美元）——呢笔钱够买过亿个蚊帐，以
保护世界上最贫困人口免受疟疾嘅困扰；或者支付４００万爱滋病患者一年嘅治疗费用。６００亿点使法呢？
旧年冬天从北海道新千岁机场清理并储存大约３０吨积雪，用于取代喺峰会期间１７０平方米媒体中心嘅空调
制冷——预计可以减少喺会议前后十日因空调而带嚟嘅１吨二氧化碳排放量；为求会场所在地洞爷湖温莎饭店
嘅无线通信网络畅通无阻，北海道当地通信企业使咗２８亿日元（大约２５９０万美元）架设专门嘅无线通信
设施；斥资９０００万日元（大约８５万美元）喺北海道新千岁机场添置一个豪华休息室，供与会代表抵达嘅
时候作短暂嘅休息——但系呢个豪华休息室将会喺峰会结束之后被拆毁……

　　不过３年前曾经提出过话要帮助非洲解决粮食同埋农业发展等问题嘅数百亿美元援助预料就会冻过水嘞！
究竟呢个新时代嘅“八国联军”系想搞“富国俱乐部”，定系策划紧新一轮嘅瓜分世界蓝图呢？

　　法国财政部长克里斯汀·拉贾德（Ｃｈｒｉｓｔｉｎｅ　Ｌａｇａｒｄｅ）用“３Ｆ危机”嚟形容目前嘅
世界经济嘅状况——金融（ＦＩＮＡＮＣＥ）、燃料（ＦＵＥＬ）、粮食（ＦＯＯＤ）。目前，由于石油价格
高企，粮食（以粟米为主）被用作提炼生物燃料嘅主要原料，从而导致咗粮食价格嘅不断上涨，但同时亦都令
部分地区嘅饥荒日趋严重，而且大面积单一种植破坏咗好多地方嘅生物多样性！燃料供应紧张、粮食价格高昂
……金融财务又点可能健康呢？

　　如今，喺南非已经有好成熟嘅技术将煤炭转变成为石油，而且成本只系喺２５～２８美元一桶左右。但系
由于生产所造成嘅环境污染相当严重，遭到环保人士嘅反对，所以好难推广应用！

　　Ｇ８口口声声话要减排，但为首嘅美国竟然唔肯喺《京都议定书》上面签名，噉讲乜都假！全球各地都有
各种各样嘅节能措施，好多人都减少咗放假外游嘅计划，有啲地方嘅人甚至骑马返工、外出。反观中国，政府
并冇带头削减公务车嘅数量，官员依然坐喺冷气房办公，继续建设各种高楼大厦嚟消耗能源，噉有乜办法唔令
油价高企、气候暖化、天灾不断呢？

　　今日小小平嘅表现亦都令人不尽满意——佢老窦原本想佢接触多啲平民百姓，点知佢就首先走去关注中产
家庭，对于基层嘅声音了解都系唔多够！

　　希望唔晴嘅七月七能够早啲转晴——至少可以令心妹觉得放晴，因为今日到佢牛牛！