王师奶何许人也？当然就系夫家姓王嘅师奶啦！睇过《恭贺黄师奶弄璋之喜》嘅人就应该唔使问啦！
不过今日我卢总所要恭贺嘅呢位“王师奶”就唔同阿“黄师奶”，因为呢位“王师奶”就目前而言，就系
王先生嘅“师奶”、“恨你”、“爱人”、“老婆”、“未黄面婆”……
当然啦，“王师奶”最近多咗个身份——王先生个女个妈。从此，“王师奶”会继续过佢嗰种“好命”嘅
生活。记住，“生仔”只不过系好听，“生女”先至系“好命”！
噉讲咗咁耐，究竟呢位“王师奶”系何许人也呢？佢就系啱啱生咗个千金宝贝、有女万事足嘅“阿朱”，
曾经做过广东人“心抱”嘅刘涛嘞！
上个月嘅廿二号，即系“六·二三”之前嘅嗰日，刘涛就顺产生咗个千金小姐——之所以话佢“顺产”，
并唔系因为睇咗啲官方公布，或者系听到咩小道消息，根本就冇呢方面嘅信息来源，而系刘涛今个月５号喺佢
自己个博客里面讲嘅。试问一个难产或者剖腹产嘅人，有冇可能喺半个月里面就迅速恢复得到呢？答案系冇乜
可能——讲到话生产方面嘅经验，睇怕都冇几多个人及我丰富！我噉讲，并唔系因为我经手得多，而系啲妈咪
钟意同我分享佢哋嘅经验，讨论产后调养问题，好多产前焦虑、产后抑郁都系揾我打救嘅。所以，我重使得过
嗰啲咩武志红——叫佢行开一二便得嘞！广州话都唔识，点开导你哋呀？
讲返今日嘅主角刘涛。大家要记住，呢个“涛”字应该系读“逃”，第四声，唔系第一声嘅“滔”，各位
唔好学本地某啲垃圾传媒噉乱咁帮人哋“涛哥”改名——香港就有个“何文汇”教香港教统局“邪音”，岭南
地区一大班垃圾官方传媒就自以为是、自把自为，利用工作之便，滥用公帑同传声筒，教“病毒邪音”畀平民
百姓，篡改历史，制造污染，毒害人民，破坏岭南文化……其罪滔天，真系罄竹难书！
最初见刘涛，系喺嗰部《外来媳妇本地郎》，佢饰演康家老三康祈耀嘅老婆胡幸子——我一睇刘涛就觉得
佢绝非池中之物，屈喺呢部《外来媳妇本地郎》里面就真系嘥鬼咗佢！嗰个噉嘅康祈耀根本就衬唔起一个噉嘅
老婆，两个人迟早都会离婚。果不其然，套剧做咗冇耐，幸子就同康老三离婚，远走高飞嘞。一如我当年睇嘅
《真情》噉，嗰个卢庆辉饰演嘅唐立生同埋郑子诚饰演嘅李子浩，一出嚟就知佢哋唔系好人，最终唔会有乜嘢
好结果一样，我批亲嘅都系咁准，实中！现实中，屎蹄熏同佢个猪猪又系畀我批中佢哋两个有缘无分，最终都
系竹篮打水。有时候人嘅嘢，唔好以为你哋两个互相钟意对方就真系可以喺埋一齐，可唔可以成为夫妻，能否
白头到老，其实都系有相可睇嘅！
刘涛离开咗广东电视台，走去拍琼瑶嘅《还珠格格Ⅲ·天上人间》，饰演缅甸公主慕沙，虽然唔算得话好
成功好出彩，但感觉上比“执二摊”嘅黄奕、马伊琍都要出色得多。其后刘涛饰演嘅《天龙八部》嘅“阿朱”
姑娘就真系冇得顶嘞——不但使佢一举成名，更加令呢个“阿朱”姑娘嘅角色成为咗“经典”——好多人甚至
要求改剧本，唔好畀“阿朱”姑娘就噉香消玉殒。你话做演员做到噉，重有咩所求呢？两年之后，刘涛成功噉
喺《白蛇传》里面塑造咗另外一个别具灵气嘅白素贞，可以讲得上系同赵雅芝饰演嘅白娘子不相伯仲。一个人
如果可以身负几个经典角色，夫复何求呢？
难得嘅系，如今嘅刘涛，自嫁入王家之后就立心退出娱乐圈，谂住就留喺屋企相夫教子，除咗必要嘅公益
活动，我谂暂时应该冇乜嘢可以改变到佢嘅主意。要一个事业如日中天嘅女人放低晒佢一切，做个归家娘绝对
唔系一件容易嘅事。但刘涛就做到咗嘞——舍弃佢嘅演艺事业，得到佢嘅理想家庭生活。
今日系刘涛嘅生日，祝呢位“王师奶”生日快活、身心健康、家庭幸福！我哋都要学下佢噉样“放低”！
人嘅嘢总系好奇妙嘅——有时个天畀咗好多好嘢过你，佢就会喺其它地方攞返走一啲嘢。所以懂得“放低”，
又识“舍得”嘅人都系幸福嘅人！
