广州话有句歇后语——记住，系“歇后语”，唔系“揭后语”，米以为两个字形近音似就系一回事，其实
啲人讲“揭后语”系唔啱嘅，应该系“歇后语”先啱。我国现存最古老嘅歇后语应该都系呢句：亡羊补牢——
“为时未晚”或者“为时晚矣”。出自《战国策·楚策四》：亡羊而补牢，未为迟也。究竟系晚定唔晚，迟定
唔迟呢？噉就要视乎你点睇法嘞。

　　广州话有句歇后语——“床下底破柴”，我谂好多人都应该听得多嘞，但知唔知点解呢？

　　最近研究咗下家私——记住，系“家私”，唔系“家俬”或者“傢俬”，“家俱”或者“傢俱”就更加之
系无稽！家私嘅变化，见证咗我哋嘅时代发展，越系细分得清楚认真嘅地方，文明程度越高，文化内涵越深！

　　就比如讲“床”。“床”喺唐代之前唔系用嚟瞓觉嘅，而系用嚟坐嘅——唐朝诗人青莲居士嗰首出晒名嘅
《静夜思》：“床前明月光，疑是地上霜。举头望明月，低头思故乡。”当中嘅“床”就唔系用嚟瞓觉嘅床，
而系爱嚟坐嘅“胡床”。广州话里面有句说话叫做“龙床都不如狗窦”，呢个“龙床”并唔系皇帝瞓觉或者做
爱做嘅事嘅地方，而系佢每日上朝，接受文武百官朝拜、山呼万岁嘅时候所坐嘅“凳”。到咗宋代嘅时候，床
先至定型为卧具，而坐具就发展出“凳”、“椅”等唔同嘅家私。直到今日，更有自外洋舶来嘅“梳化”——
绝对唔系“沙发”！

　　明清之后，“床”主要都系用嚟瞓觉嘅——当然啦，顺便都要传宗接代。所以古时候啲床都好大“间”，
而组合嘅零件可以成百上千，雕栏画柱，俨然就系一件价值连城嘅艺术精品。所以古时候做木工都应该系一个
几唔错嘅行头，开工时间足，收入又高。若然你唔信嘅，可以去睇下旧时啲古装戏，又或者系去参观下陈家祠
之类嘅博物馆。

　　广东地处南方，湿气比较重，所以啲床唔单止大间，而且离地重好高添。于是床下底就会有一定嘅空间，
可以摆放一啲杂物，同时亦方便啲奸夫或者百厌星躲藏。

　　喺我哋重未发现并且推广使用“煤”呢样嘢嘅时候，家家户户多数都系以烧柴为主。啲樵夫喺山上斩好咗
啲柴就会攞入城卖，啲人买咗柴返屋企，重要将啲大枝大枝嘅柴劈成一小段一小段噉样，先至可以攞去烧——
将大大枝嘅柴劈成细细嚿嘅木头，是为“破柴”。今日，连住喺城郊嘅人都转用石油气，年轻嘅一代人多数都
未见过柴刀，更加唔知“破柴”为何物。

　　破柴就系用柴刀自上而下，将碌粗大嘅柴一分为二，再分而四……一路系噉分落去，直到啱灶大细为止。
不妨试谂下，如果你将“破柴”呢样嘢搬到床下底进行，结果会点？！

　　所以“床下底破柴”呢句歇后语就系“撞板”或者“撞大板”、“包撞板”嘞！

　　讲起“床下底破柴”，系因为最近谂起一个同我相交咗将近卅年嘅好朋友。以前细个读书，只要我哋听见
嗰个可能同而家嘅世卫总干事——陈冯富珍有啲关系嘅女人闹人哋话“实撞板”嘅时候，我哋两个都会狡黠噉
相视而笑。而家谂返起当时嘅情景都觉得好鬼过瘾——当然，嗰个疑似同陈冯富珍有关系嘅女人系唔可能知道
我哋两个笑乜嘅！哈哈哈！今日呢篇《畅谈广州话·床下底破柴》就送畀呢位听见人哋话“床下底破柴”就会
笑嘅朋友！恭喜！恭喜！

　　今日查资料嘅时候见到中山大学校园博客贴出如此公告：由于公安局网监处发现本网站中含有攻击国家、
国家领导人、描写中国黑暗面等有争议或过激政治言论，要求对相关文章进行删除处理后才能重新开放，本博
客系统暂停使用，清查后再行开通——莫非系有人喺中大嘅“床下底破柴”？！噉我寻日嗰篇《话之你市民有
几急！》又点啊？


一年前嘅杰作：一个环保悭水嘅洗碗方法