香香公主自京城打长途电话嚟，托我办啲事。言谈间提及家下喺京城出入十分不便，到处都系岗哨关卡，
检查呢样，登记嗰样，俨然一副如临大敌嘅样子。我话睇新闻报道都知啦，入京嘅车辆同人员要过三道关卡，
啲关卡都有戴住钢盔、着住避弹衣、荷枪实弹嘅军警把守——我谂，呢种阵势应该可以同巴格达、以巴接壤嘅
加沙地带、印度控制克什米尔地区、苏丹嘅达尔富尔地区……媲美！
反恐、反恐，越反越恐——呢个本来系嗰条废柴布薯仔造成嘅西方社会局面嘅写照，但如今套用喺中国嘅
ＰＫ，亦不为过。你只要睇下无线电视驻ＰＫ记者李家文喺ＰＫ嘅报道就知道嘞：ＰＫ啲住宅区早就开始监察
区内居住嘅人员，一发现有外地人，尤其是辛姜人，佢哋就会特别“关心”人哋嘅来历、行踪，一个二个当咗
人哋“可能”系“孔布分子”先，一有咩唔妥就会“劝吁”呢啲人搬离呢个社区，搞到人心惶惶，个个都不知
所措。一个美国商人曾经喺２００４年讲过：“（我哋嘅）政府喺世界上越霸道，越威风，老百姓就越胆小，
越可怜。”同样，ＰＫ啲老百姓都好鬼可怜！
ＰＫ啲老百姓嗰种可怜法同样可以喺最近新实施嘅一系列管理措施体现出嚟：搭地铁要安检、汽车牌号分
单双日上路、封存部分单位车辆、开辟奥运专用交通行车路线及车道（禁止其它非专用车辆使用）、每日朝早
六点半到凌晨十二点禁止货车喺市区内行驶（搞到嗰啲搬屋公司全部都要夜间作业，好似做贼噉）……我收到
最新嘅消息系话，奥运期间将喺全国范围内规范含兴奋剂生物同中药制剂嘅生产、经营同埋销售，喺零售药店
里面，除咗胰岛素以外嘅蛋白同化制剂及肽类激素，一律停止销售。噉就即系意味住，鼻炎片、柴连口服液、
大活络丸、追风膏、复方川贝止咳糖浆、感冒胶囊、急支糖浆、喘舒片、喘息灵胶囊、肺气肿片、止喘灵气雾
剂、肠胃宁、克咳、咳喘宁、咳速停、小儿止泻灵、溃疡宁片、降压避风片、罗己降压片、珍菊降压片、安宫
牛黄、脉君安片、八宝丹、跌打七厘胶囊、救心丸、牛黄解毒片／丸、流感胶囊、马应龙麝香痔疮膏、胃尔康
片、跌打万花油、皮炎平、风湿关节炎片、派瑞松、骨刺胶囊、关节炎膏、颈腰康胶囊、腰痛宁胶囊……等等
将近一千二百种老百姓经常使用嘅药物被禁止销售。果然系全民参与，连唔参加奥运比赛嘅老百姓都话要禁止
使用兴奋剂！鼻炎流鼻水、流行性感冒呀？你嘅事！周身骨痛？话之你啦！
ＰＫ嘅首钢集团喺奥运期间压缩生产，生产量将只有旧年同期嘅两成七，好多锅炉、炼钢炉都已经停工，
部分生产设施已经迁到唐山地区（但唔承认系将环境污染转移到其它地区），以改善ＰＫ地区嘅空气质素——
当然啦，部分工人会因此而失业，或者因开工不足而导致咗收入减少。但系问题系，噉做其实只系杯水车薪！
关闭到三两间污染严重嘅生产厂，但封唔到ＰＫ几百万部车嘅死气喉，又关唔到京城数以万计嘅高楼大厦中央
空调，更加阻止唔到从蒙古草原吹过嚟嘅沙尘暴！
今年３月初，世界马拉松纪录保持者，非洲埃塞俄比亚嘅长跑名将——海利·基比斯拉斯（Ｈａｉｌｅ
Ｇｅｂｒｓｅｌａｓｓｉｅ）宣布，由于担心北京嘅空气污染，而ＰＫ奥委会方面又唔肯将马拉松比赛嘅时间
提早至清晨时分，于是佢决定退出马拉松嘅角逐，而只考虑参加五千米同一万米嘅竞逐。梗系啦，你叫啲主持
马拉松比赛嘅ＣＮ官员倒塔咁早就起身噃，点有可能先得嘎？！呢个消息一传出，中国嘅网上论坛几乎一面倒
噉指责、批评基比斯拉斯，话奥运马拉松比赛多佢一个唔多。更有甚者，有人提问：埃塞俄比亚几时可以举办
奥运会？
认真系无知就大无畏！基比斯拉斯本身就系患有哮喘嘅，而炎热、污染同埋高湿度都会严重威胁到马拉松
运动员嘅身体健康，更何况基比斯拉斯系哮喘病患者？因此，我又想问下嗰啲指责基比斯拉斯嘅人：你又几时
跑过马拉松啊？
可能，喺运动员嘅心目中，奥运金牌系至高无上嘅荣誉；但系，生命对于一个人嚟讲，应该先至系最宝贵
嘅！我谂，今年赢到男子马拉松奥运金牌嘅人一定唔会觉得好光荣。因为世界第一嗰个冇落场同佢同场竞技，
即使佢系赢咗场比赛，但点都可以话佢系“胜之不武”！
世界女子马拉松最佳时间纪录保持者，英国名将列姬芙（Ｐａｕｌａ Ｒａｄｃｌｉｆｆｅ）亦对北京嘅
空气质素表示关注，旧年已经揾研究污染嘅专家帮佢部署比赛嘅战略。对于北京嘅空气质素可能会导致佢哮喘
发作，佢相信主办单位会尽一切方法改善，又话只能够准备足够药物——唔知到时又过唔过到海关呢？会唔会
畀人话佢服食兴奋剂呢？你知道吗？好多医哮喘嘅药都含有类固醇嘅。
此外，世界女子网球排名第一嘅比利时球手轩宁、上届奥运女子二百米金牌得主牙买加嘅甘宝同美国泳队
都先后指北京嘅空气污染系运动员嘅一大威胁。唔少参赛国家都对ＰＫ空气问题表示担忧，打算选择亚洲其它
国家，例如日本、南韩或者星架坡作集训地点，以缩短喺北京嘅逗留时间。英国已经选定喺澳门集训，以减少
空气污染对运动员身体嘅负面影响。美国亦计划喺奧运开幕前两三个礼拜，先去亚洲其它国家驻扎。
有一点好奇怪嘅就系，香港每年都会举办国际马拉松大赛嘅，而且次次都吸引数以万计嘅国际马拉松运动
爱好者参加，比赛基本上都系喺清晨开始进行，既确保参赛者嘅安全，又保障到交通唔会因赛事而大受影响。
点解ＰＫ奥委会方面就唔可以采纳基比斯拉斯提出嘅改变比赛时间嘅建议呢？系唔系官僚主义严重咗啲呢？
官僚主义严唔严重呢，睇怕就要等啲记者帮我哋采访过先知。但原来记者采访新闻嘅自由系好有限嘅！
七月一号下昼五点几，３８岁嘅“生果日报”首席记者蔡元贵同一名摄影记者承搭港龙航空嘅班机抵达咗
ＰＫ机场。排喺前面嘅摄记顺利过关，但当蔡元贵出示回乡卡，边检人员查完电脑之后，就要佢等一阵，跟住
致电通知同僚。另一名边检人员到场，要求蔡元贵出示香港身份证，并带佢入一间房。５分钟之后，一名边检
人员查问蔡元贵嘅工作单位、在京住处及香港住址。１０分钟之后，边检人员就表示，根据《国家安全法》，
没收其回乡卡，并要佢即时返回香港。蔡元贵询问对方没收回乡卡嘅理由，一个姓赵嘅主管级边检人员就一手
指住自己嘅证件，一只手就揸住张纸，重复噉宣读头先嘅一番说话，但就冇进一步解释涉及《国家安全法》嘅
边啲条文。蔡元贵要求对方提供书面纪录说明遣返原因，但个姓赵嘅边检主管人员就着佢自行上网查阅《国家
安全法》。最后，蔡元贵喺两个边检人员押送之下，好无奈噉踏上挨晚６点半嘅港龙航空班机返回香港。可能
又系一起“陈巧文式”嘅拒绝入境事件——不过今次就更加严重啲，连人哋回乡卡都没收埋！
“生果日报”表示，蔡元贵喺出发之前已经向ＰＫ报名采访奥运及缴付入住奥运村嘅费用，又获有关当局
发出确认文件——噉即系具备采访资格啦。今次蔡元贵上京系为采访ＰＫ奥运作准备及进行前期采访，唔明白
ＰＫ当局点解要根据《国家安全法》没收其回乡卡，导致佢无法进行正常嘅采访活动。“生果日报”对此表示
遗憾，并就此与有关方面联系及交涉，要求发还蔡元贵嘅回乡卡，及对事件作出合理交代。
香港记者协会对事件表示关注，呼吁当局应该对有关决定给予合理解释，并重申ＰＫ应该对合法前往采访
嘅记者给予一视同仁嘅待遇。过去，大陆官员曾多次就“生果日报”及“壹传媒”记者不能进入大陆采访作出
评论，指其“自己知自己事”。
好多人都认为，ＣＮ政府既然已经发出通知，开放到ＰＫ采访奧运会嘅规定，噉就应该对所有传媒都一视
同仁，容许不同立场嘅传媒机构代表到ＰＫ采访，等佢哋可以更深入噉认识中国、了解中国，唔使搞到下下都
“逢中必反”——噉对双方都有好处。
采访自由系ＰＫ为办好奧运嘅承诺之一。２００６年１２月，国务院已经公布咗外国、港澳台记者到内地
采访嘅新规定，同意境外记者“只需征得被采访单位和个人的同意”，就可以喺内地自由采访。《北京奧运会
及其筹备期间港澳记者在内地采访办法》更承诺，从旧年１月至今年１０月１７号，“港澳记者来内地采访，
可持港澳居民来往内地通行证、奧林匹克身份注册卡或其他有效证件多次入出内地”。ＰＫ奧组委主席刘淇喺
６月２０号先作出过“零拒绝”嘅承诺，估唔到，十日之后就发生啲噉嘅事，真系严重损害国家形象！
香港及国际记者组织、人拳团体及香港立法会议员纷纷批评呢种做法冇尊重身痕自由，破坏咗向国际社会
开放奧运采访嘅申奧承诺，系非常之严重嘅事件，并且系相当落伍嘅做法，亦同当局一路宣称嘅“以法治国”
背道而驰。
总部位于巴黎嘅“无国界记者”发言人Ｖｉｎｃｅｎｔ Ｂｒｏｓｓｅｌ回应时指出，境外记者采访内地
新闻仍然十分困难。四川地震嗰时，ＰＫ方面看似好开放，但其后死者家长展示愤怒之时，采访就受到阻挠。
佢又话“生果日报”一直对ＰＫ采取批判立场，但噉唔应该成为中方阻止佢哋采访嘅理由。而法国嘅著名报章
《Ｌｉｂｅｒａｔｉｏｎ》前驻京记者Ｐｉｅｒｒｅ Ｈａｓｋｉ就话，类似情况喺过往嘅奧运会非常罕见，
呼吁国际奧委会应尽快跟进呢件事。国际奧委会主席罗格喺瑞士洛桑回应香港传媒查询时表现错愕，话对此事
毫不知情，但佢认为，奥运会应该同政治分开。
十日之后，亦即系７月１１号，明报驻ＰＫ记者采访华夏商品现货交易所涉嫌诈骗人民币一亿七千万元嘅
案件时，被四名穿着制服及便衣嘅公安包围，对方抢走记者嘅相机及检查记者证。其后公安将相机摆喺柜台，
记者攞返相机后发现记忆卡唔见咗，于是要求攞返记忆卡，但系公安否认有攞走记忆卡。明报驻ＰＫ办事处向
ＰＫ市政府及港澳办官员投诉此事，寻求协助，但记忆卡一直冇交还——照睇最后即使有交还，都不过系一张
空白嘅、格式化过或者经过“处理”嘅记忆卡。香港记者协会及国际记者联会发表声明，要求中方就明报记者
喺ＰＫ采访遭受不安干预作出解释。睇怕此举又系徒劳嘅！
从旧年到而家，无国界记者及外国驻京记者已经多次批评中国冇兑现承诺，一再限制采访。自从今年３月
犀撞发生大件事后，当局加强咗对境外记者嘅控制。日本、法国、荷兰等国嘅记者早前喺四川采访学生家长嘅
时候分别受到阻挠，甚至羁留。无国界记者因此发表过声明谴责。香港记者喺贵州采访民众因为掌上压（即系
“俯卧撑”）引起嘅乱龙事件，曾经一度遭当地官员扣留。
一连串嘅事件显示，ＰＫ方面可能已经收起采访豉油嘅幌子，重走身痕管制嘅旧路。虽然李长春今日又去
奥运新闻中心勉励记者，但系呢种只系“欢迎宣传”唔“欢迎采访”嘅做法，有几多记者会听佢哋支笛呢？
ＰＫ奧运嘅口号系“同一个世界，同一个梦想”，唔通连身痕都要“同一个口径”？我讲过，两公婆同床
都会异梦，噉又点可能“同一个世界，同一个梦想”呢？重要身痕报道“同一个口径”添？！
有人就问嘞，中国嘅身痕自由几时能够同世界同一个模样？中国咁多年以嚟僵化嘅“大一桶”思维同世界
主流嘅多元化又是否能够融为一体呢？
我觉得正苦官员噉样处理境外记者采访身痕嘅手法好有问题，长此落去，对我哋国家好蚀底！试谂一下，
经过今次举办奥运嘅经验，世界各国都睇到中国嘅处事方式同办事能力，同时亦都睇到中国同世界各国之间嘅
差异。ＣＮ政府本来系希望以举办奧运显示自己同国际社会接轨嘅能力，但系一连串嘅事件暴露咗ＰＫ喺身痕
自由嘅问题上，同国际社会持不同嘅准则，打击咗中国走向世界嘅愿望。第日ＣＮ政府再申请举办其它国际性
活动嘅时候，好难讲会唔会畀人哋翻旧帐，对争取支持相当不利！
我相信嗰班领导层系有心想搞开放嘅，但可惜下边执行嗰班人四肢发达，但头脑简单，思想又唔得解放，
一味就系怕孭镬，始终都抱住“多做多错，少做少错，唔做唔错”嘅宗旨处事做人——有杀错，冇放过。一如
广州有线电视嗰班死仆街噉款，领导人嘅公开讲话都要挂神主牌，真系唔死都冇用！
有好多人误会咗呢届奥运喺ＰＫ举行，所以中国就系东道主，中国就系主人家。其实，真正嘅主人家应该
系国际奥林匹克委员会（ＩＯＣ），中国只不过系呢届奥运会嘅“承办商”，俗称“包工头”——中国嘅角色
就系要协助国际奥委会举办好第２９届国际奥林匹克运动会，招呼好来自世界各地嘅运动员、教练、领队同埋
各国政要。所以，中国应该以谦恭嘅态度，面对国际奥委会，面对国际社会，面对世界人民，千祈唔好以主人
自居！
但系可惜，中国做唔到，ＰＫ做唔到！ＰＫ一开始就以主人嘅身份自居，所以导致今日搞成噉嘅鬼样——
ＰＫ的而且确已经变成咗一座死城，一座冇晒活力嘅死城！呢个城市里面嘅人要牺牲自己嘅日常工作同生活，
嚟迁就呢个大型活动嘅举行；呢个国家嘅人民更加要牺牲自己嘅环境同资源，确保为呢件盛事提供安全嘅设施
同良好嘅场地，但系佢哋就无法参与其中，享受一下辛劳嘅成果！
寻晚睇《星级酒店》（Ｈｏｔｅｌ Ｂａｂｙｌｏｎ），安娜同卓凌发现，正喺佢哋酒店举办紧推广活动
嘅时尚（ｄＲ）时装公司老板潘纪斯为咗要赚取丰厚嘅利润，不惜隐瞒服装厂雇用、虐待童工嘅事实——嗰啲
细路每７个钟头先至准去一次厕所，擅自攞嘢食就会被虐打，手脚慢啲都畀人责骂。公司嘅欧洲区总监邓大伟
获悉呢件事，要求潘纪斯正视呢个问题，以免影响公司声誉。点知潘纪斯就砌邓大伟嘅生猪肉，随即将佢豉椒
炒鱿。安娜同卓凌都睇唔过眼，觉得做生意应该要讲下良心，于是两人就揾埋邓大伟一齐嚟揭穿呢件事，最后
将贪得无厌嘅嘅潘纪斯搞到身败名裂。呢件事就系话畀我哋知：冇人会钟意嗰啲靠损害他人嘅利益而制造出嚟嘅
产品！
同样，如果啲人知道ＰＫ奥运背后咁多不为人知嘅事情，唔知啲人会点谂法呢？会唔会好似时尚（ｄＲ）
时装公司啲客人噉纷纷起身离场呢？史提芬史匹堡拂袖而去，会唔会系因为知道咗一啲我哋都唔知道嘅内幕，
唔想同流合污，所以就擗炮唔捞呢？史提芬史匹堡选择离开，会唔会只系一种好体面嘅做法？查实佢都系畀人
炒鱿鱼嘅呢？！
冇错！讲到尾，我都系希望呢届奥运开唔成！即使最后真系开得成，我始终认为奥运开幕式应该做粤剧！
不过应该唔使谂嘞！因为奥运开幕式唔系揾今日牛一嘅国际知名大导演王家卫嚟搞，而系揾个既受国人唾骂、
又唔得洋人欢心嘅“土老冒”乡下佬嚟做总导演。试问，噉嘅垃圾会有咩好嘅出品？大家即管放长双眼嚟睇，
除咗京剧，呢个只识托大脚嘅乡下佬一定唔会将比京剧历史更加之悠久、拥有更丰富文化内涵、洋大人既喜欢
又熟悉嘅粤剧摆出嚟，中国嘅多元文化就噉衰喺啲冇见识嘅乡下佬手上！
北京已经整定，系一座死城。你我都无能为力去挽救——惟有睇住佢点样丢架。最惨嘅系，本来谂住可以
透过旅游活动赚返笔嘅旅行社同埋酒店业，因为政府收紧签证，加上封城，搞到间间门可罗雀，有啲中小企业
甚至重要关门大吉添——奥运真系害死人！冇法子啦，奥运冇咩系第一嘅，只有安全系第一嘅！中国其实根本
就唔具备搞咁大型活动嘅能力，睇下早前地震点样就知嘞！
