今日系肥佬牛一，谂唔到送咩畀佢好，Ｂ女话应该要整啲有原创成分嘅嘢，于是就决定撰文一篇送畀佢，
祝佢要风／峰／疯得风／峰／疯，要雨／乳得雨／乳，想点／癫就点／癫！

　　家下已经开始放暑假嘞，好多人都会趁机出去旅行一番，以放松一切身心，或者系学习知识、吸取经验、
增广见闻……呢啲都系好事，卢总十分之赞成——尤其是有钱嗰啲。噉如果系冇乜钱嘅又点算呢？噉冇乜钱就
梗系多啲上嚟踩下卢总个场，睇下卢总有咩悭钱大法或者发达秘笈，噉你就冇钱都变有钱，有钱就变有好多钱
啰！系咪？

　　出外旅行必然会遇到一个问题——点样洗衫。如果系秋冬时节，唔紧要啦，嗰几件衫着多几日唔系问题；
但问题系，而家系夏天，有啲人一日要换几次衫，嗰啲衫好多汗味，唔洗唔得，点算好呢？有钱嘅可以揾酒店
或者旅舍嘅洗衣部帮你搞掂，但价钱就非常昂贵，分分钟洗衫钱重贵过你件衫，每日上下、内外嘅衫裤袜加埋
都几系嘢！如果旅程系十几廿日，甚至系一头半个月嘅，建议最好尽快揾标基斯做你契爷！

　　如果揾唔到标基斯做你契爷，噉就要睇下卢总教你嘅旅行悭钱洗衫大法嘞！

　　首先，喺你出发去旅行之前，你就要准备定几个衣架——虽然好多酒店房里面都有衣架提供，但大部分都
唔会啱你嘅心水，到你打开房间衣柜道门嘅时候你就知！查实几个衣架唔会占用你个袋几多地方，而且而家又
有啲折叠式嘅新型衣架，既方便又轻巧，带多几个都唔系问题！

　　喺酒店洗完衫之后，就用酒店嗰啲吸水能力特强嘅大毛巾包住你啲湿衫裤，然后摊开，再卷埋佢……如此
反复做多几次，好快脆，你啲衫裤起码就干咗六七成。然后用你啲衣架挂起身，最好就挂喺酒店嘅送风口——
噉样，你晚黑洗好嘅衫，第朝起身就已经干晒可以收，又唔使另外畀钱酒店赚，系唔系好使得呢？哈哈哈！！

　　我呢个“旅行悭钱洗衫大法”屡试不爽，系人用过都话正！大赞值得推广！

　　噉你哋用咗我呢个悭钱大法，悭悭埋埋，应该都唔少钱啦？你哋识点做啦！

　　我都系咁钟意呢个生活哲学：比别人花得起，不值得骄傲；比别人懂得花，才是真正学问！