对于系统寻日推出嘅“抢沙发”功能甚表不满——因为我哋只会坐“梳化”，而并冇咩“沙发”！

　　外洋舶来之物（记住“舶”系航海嘅大船，“泊”作动词解停船靠岸，因此“来佬货”都要靠“舶”运送
过嚟，“舶来品”唔可能“泊来”）ｓｏｆａ，“梳化”嘅音译比普通话“沙发”准确得多，而且意思亦非常
贴近。

　　“ｓｏｆａ”其实系法语，源自阿拉伯语“ｓｕｆｆａｈ”，法国人喺西亚一带见到铺咗垫嘅座台坐落好
舒服，于是就整咗一种有靠背，既可以畀几个人一齐坐，又可以畀一个人瞓嘅坐具，命名为“ｓｏｆａ”。

　　英文有好多词都系从法语中搬过嚟嘅——“ｓｏｆａ”都系噉样。以前啲人嘅英文或者法文水平都系有限
公司，好容易会“见边读边”，所以佢哋见到“ｓｏｆａ”就会读成“梳化”。虽然较诸准确嘅读音“骚化”
重系有些少距离，但就远胜于用普通话音译嘅“沙发”——根本就系“狗唔搭八”！况且，“ｓｏｆａ”最早
喺岭南大地登陆，所以系读都应该跟返我哋岭南人嘅习惯！

　　重有，当你坐落张“ｓｏｆａ”或者瞓喺“ｓｏｆａ”上面嘅时候，系咪感觉到全身放松，成个人就好似
融化其中，舒服到不得了噉呢？冇奶油你瞓喺“ｓｏｆａ”或者坐喺“ｓｏｆａ”就会发达嘎！发“毛”（读
第一声）都或者重有啲可能。

　　近年嚟，广东嗰啲“淫媒”（经常意淫、专发邪音嘅传媒）甚至令人发指到居然叫出“沙化”——认真系
不知所谓啊！“沙化”者，即“沙漠化”也！我哋岭南肥沃嘅土地畀嗰啲狗官噉样破坏法，历史悠久嘅文化又
畀啲“淫媒”噉样颠覆法，唔“沙漠化”就真系有鬼嘞！

　　所以，大家都应该要清楚返呢一点：我哋坐紧嘅系“梳化”，非“沙发”，更加唔系“沙化”！

　　寻日，系统整咗个“抢沙发”嘅功能出嚟，又整埋“快速评论”畀人乱发，睇到就唔多舒服嘞。如果系想
搞论坛化，不如提供一下“引用”嘅功能好过，方便啲人互动吖嘛！

　　因此，从呢一刻开始，凡系单用系统“快速评论”嘅，不论亲疏，全部一律删除，冇人情好讲！

　　另外，你哋各位以往所留脚毛，我都会认真回复，请各位耐心啲，我一定唔会当佢哋系透明嘅！