“大暑小暑，有食懒煮”都可算系我哋岭南人民嘅智慧精粹嘞！

　　“大暑小暑，有食懒煮”系我哋岭南地区嘅民间谚语——做得民间谚语嘅，就梗系有番咁上下嘅份量啦！
呢句说话说明咗，喺大暑同小暑呢啲噉嘅节气，由于天气炎热，个个冇晒胃口，而且对住个火炉都惊会中暑，
所以求祈有嘢食，就个个都懒鬼得去煮。

　　故此，今日算起得比较早嘅我，见到重有香蕉，一于就懒煮——食咗先算！

　　查实，空肚食香蕉唔系咁好嘅！因为香蕉含有丰富嘅镁元素，如果空肚嘅时候大量进食香蕉，会令血液中
镁嘅含量骤然升高，造成人体血液内镁同钙嘅比例失衡，对心血管有抑制作用，不利于身体健康！

　　不过，如果你肚饿嘅时候，乜鬼嘢都冇啲落肚嘅话，你胃里面啲胃酸对胃壁嘅侵蚀都好犀利！有啲人个胃
得胃溃疡，甚至系胃穿窿，同个胃肚饿嘅时候成日冇嘢到不无关系！所以权衡利弊，肚饿嘅时候，如果只系得
香蕉嘅话，食佢一只半只，顶住下肚饿先，问题唔大嘅——最紧要你唔好搏命咁食，噉就冇问题！至于香蕉嘅
近亲大蕉同粉蕉，虽然研究唔多，但相信佢哋嘅营养成分同香蕉都系差无几，所以各位都要小心！

　　半个月前嘅小暑，天气唔算好热，连卅度都唔够，重有连场暴雨添，所以今日肯定会好热！小暑唔热大暑
热——又系我哋充满智慧嘅民间谚语！啲狗官肯定又系开行冷气叹世界，话之你市民用电跳闸！虽然礼拜日有
三千傻十出嚟嘅人跳咗落去嗰条假清洁嘅珠江做工程，但噉做对环保一啲帮助都冇，只系徒添坊间笑话而已，
真系愚不可及嘅举动！

　　大热天时，我哋岭南人最钟意就系煲冬瓜嚟解暑，至于点煲冬瓜法，就请各位参考下《十二月练功祛病·
六月》——唔好以为“十二月练功祛病”系列就净系讲点练功，里面重有好多常识同智慧，建议各位多啲睇！

　　寻晚我夜观天象，只见月朗星稀——真系好稀下！就系见到两粒星！相信未来嘅两三日天气都会唔错嘅！
“唔错嘅”意思就即系话基本上都会天晴。但由于天气咁热，加剧咗地表水分嘅蒸发，因此唔排除会有局部嘅
零散骤雨。

　　听日甲子金斗执日，冲马年生人——尤其是甲午、戊午、壬午年生，宜祭祀、纳采、动土、出行、嫁娶、
纳畜、订婚、理发、安葬，忌开仓、出财（喜神東北、开门正北、吉门西北，岁煞正南，寅时、未时为本日嘅
贵人时），属于今个月嘅黄道吉日。所以，如果听日系好天嘅话，噉就去揾寡人嘅御用发型师执执佢。

　　另外，听日重系“博物馆开放日”——参观博物馆唔使畀钱。各位唔使返工返学嘅朋友不妨去啲博物馆行
一下，睇下我哋嘅岭南祖先留咗啲乜嘢优秀文化传统畀我哋，增强一下爱岭南反侵略主义教育！错过咗听日，
就要等到下个月嘅２０号先至会再有“免费开放日”。不过，大家出门前记得饮多啲水，最好就系含电解质嘅
饮品，重要喺鼻哥搽少少清凉油先好出门口啊！

　　大暑小暑，有食懒煮。睇怕今晚人人都系懒得煮，唔知今晚会有咩食呢？从而家开始，等饭局邀约……