“Ｍｙ ｌｉｆｅ ｉｓ ｆｉｇｈｔ ！”——好钟意呢句说话！呢句说话原来系出自嗰条可爱嘅大鳄
Ｍｒ．Ｄｏｎａｌｄ Ｔｒｕｍｐ嘅金口。
上个礼拜六晚嘅《飞黄腾达》承接对上嗰个礼拜未完待续嘅任务，两队要为Ｃｒｏｃｓ公司设计一个旧鞋
回收箱，将嗰啲旧鞋收集起身，整返好之后，再送畀非洲贫困人士——鬼佬嘅观念真系同我哋中国人好唔同！
好环保，亦都好……
“许德拉”嘅ＰＭ（Ｐｒｏｊｅｃｔ Ｍａｎａｇｅｒ）皮尔斯——喺《全美一叮》里面做评判，好似我
卢总噉出咗名言辞刻薄嘅英国资深娱乐记者Ｐｉｅｒｓ Ｍｏｒｇａｎ，发现隔篱女子队“企业家”过嚟偷听
佢哋开会，于是就同喺《人在江湖》演黑社会大佬、经营过夜总会同埋音乐比赛嘅文森特（Ｖｉｎｃｅｎｔ
Ｐａｓｔｏｒｅ）夹计，派文森特去做间谍，刺探女子队搞乜嘢科研——查实系想伺机铲走文森特，因为觉得
佢行行企企，食饭几味，冇乜贡献，会阻住佢发达。
文森特果然不辱使命，凭藉佢演戏嘅才华，好快就得到咗女子队嘅信任，并且帮佢哋出谋划策。但文森特
并冇忘记自己嘅角色任务，于是将女子队嘅宣传口号同设计图纸等设法交畀“许德拉”。但衰在文森特呢个人
立场唔够坚定，当佢同玛丽露一齐去工场嘅时候，佢觉得皮尔斯噉做——揾佢去做卧底，唔系好啱，于是佢就
将自己过嚟做间谍打探女子组情报嘅事向玛丽露和盘托出，并且表示唔会再帮男子组，一定会全力以赴，做到
最好，佢希望女子组会赢。玛丽露都相信文森特唔会呃佢，而且佢哋女子组又的确需要人手，于是就将文森特
留低，并且叫佢畀心机做。
另一边厢，皮尔斯睇咗女子队嘅口号同设计，知道由Ｔｒａｃｅ Ａｄｋｉｎｓ所谂出嚟嘅“Ｗｅａｒ
ｔｈｅｍ ， ｓｈａｒｅ ｔｈｅｍ”远胜女子组嘅“Ｓｈａｒｅ ｔｈｅ Ｌｏｖｅ”，男子队已经稳操
胜券，于是佢就走过去揶揄女子队，并且话埋畀佢哋知，文森特其实系佢派去女子组嘅卧底。女子组获悉呢点
之后好诧异，决定要将文森特炒鱿。文森特无论点游说、解释佢已经系双重间谍，佢只希望帮女子组赢，最终
都系畀玛丽露赶出工场——因为佢之前冇向玛丽露坦陈，曾经将女子组嘅情报交咗畀男子队。
一次不忠，百次不用嘅文森特返到“许德拉”，闹鬼皮尔斯，话佢唔应该派自己做卧底，更加唔应该将佢
做卧底嘅事讲畀女子组知。两个人为此事嘈到不可开交，其他人唔知系唔系心怀鬼胎，冇人出嚟撑佢哋，亦都
冇人肯做下和事佬。最后，皮尔斯更加将文森特赶出咗“许德拉”。愤愤不平嘅文森特喺电梯间撞到杜林普，
遂提出要退出赛事。杜林普都可算得上系公正嘞，佢冇听文森特讲太多，只系安抚咗文森特几句，着佢先返去
休息，等揭盅之后到会议室再议——嗱，呢啲就系帝皇将相嘅成功之处：兼听则明，偏听则暗。
Ｃｒｏｃｓ高层嚟睇两队人交功课。首先系女子组“企业家”，高层觉得佢哋嘅设计唔错，表达到佢哋想
要传递嘅信息，而且连宣传单张、致送嘅纪念Ｔ恤都准备埋，非常周到；不过佢哋所设计嘅鞋形回收箱实在太
复杂，制作同运输成本都会好高。而男子队“许德拉”嗰句口号——“Ｗｅａｒ ｔｈｅｍ ， ｓｈａｒｅ
ｔｈｅｍ”就实在系太精彩嘞，高层对此赞不绝口。两队嘅表现都好出色，真可谓不相伯仲，一时间都唔知
应该判边队赢……
又到咗入会议室准备决定生死嘅时刻嘞。两队人马分坐于两边，惟独文森特戴住副黑超姗姗来迟——真系
好有大佬嘅气派！文森特入到嚟，并冇坐低，而系企喺男子组后面。等到杜林普出嚟坐定发话，文森特又开声
请辞。杜林普当然冇马上接纳啦，而系向双方面不断提出各种问题，以了解真实嘅情况以及各人嘅心态。但佢
亦被人反问一啲都几尴尬嘅问题，例如会唔会喺生意场上使用间谍，会唔会为求达到目的而用不择手段？你估
唔估到杜林普点样回应呢啲问题？佢好轻描淡写噉话“无可奉告”，噉就连消带打，将个波交返畀人——你要
知道，杜林普面对住几部摄录机，讲乜都死，但系话“无可奉告”就大方得体得嚟又不失风度！我最钟意呢种
模棱两可、不置可否嘅答问方式！
由于文森特嘅双重间谍身份，跟住落嚟，杜林普又例牌问众人：“如果你系我，你会炒边个？”——呢个
问题如果答得唔好，分分钟都有可能会成为众矢之的，甚至会触怒杜林普，成为被炒对象。所以，喺呢一刻，
嗰啲人性嘅阴暗面、丑恶嘅嘴脸，通通都会浮现出嚟。
奇怪嘅系，除咗皮尔斯系同文森特针锋相对之外，其他人其实并唔系话太反感文森特，反而对皮尔斯重有
不满——史提芬宝云同Ｔｒａｃｅ Ａｄｋｉｎｓ对于皮尔斯使用诈术并不表认同（可能同佢哋都有宗教团体
嘅背景有关）；而伦诺士则认为皮尔斯作为项目经理，克尽己任，领导队员好出色噉完成咗任务，并唔需要为
输咗比赛而负上责任，所以唔应该炒佢。皮尔斯解释，之所以派文森特出去做卧底，系因为觉得文森特对呢项
任务唔会有乜嘢贡献，而且派文森特去做卧底又可以扰乱女子队，如果文森特嘅表现不佳，又可以借机炒佢。
皮尔斯重揭穿咗史提芬宝云扮“清高”，其实系想铲除自己呢个劲敌，以争取最后嘅胜利。史提芬宝云反击，
并且问杜林普，你会唔会每日瞓醒一擘大眼就谂住点样同人斗个你死我活？
“Ｍｙ ｌｉｆｅ ｉｓ ｆｉｇｈｔ ！”——点知杜林普竟然噉样回应佢。的确，人嘅一生就系充满
住斗争嘅一生！同人斗，同天斗……人嘅一生，无时无刻不在斗争之中——系啲懵下懵下嘅人先至唔知道自己
身处斗争之中。你可以喺一场战役、一场战争之中担任统帅将军，但查实喺更大嘅战局中，你不过系一个小小
嘅兵卒！所以，喺每一场战斗里面，乜嘢招数你都可能会用得到！
文森特似乎都意识到咗呢一点，但佢唔想再同皮尔斯噉样嘅人斗落去，于是佢不断噉提出请辞，但杜林普
就不断噉挽留，因为佢实在揾唔到炒文森特嘅理由——嗱，作为领袖，作为统帅，无论你系老板定君主都好，
你想炒人嘅话，一定要有真实嘅证据、充分嘅理由；否则，你就难以服众，你嘅政令就唔会有人听，有能之士
亦会离你而去，如果佢哋另投明君，噉你就麻烦嘞！佢哋分分钟会成为你最难以战胜嘅敌人！
由于文森特一再坚持，杜林普挽留不果，最后只好接受佢嘅请辞，杜林普话：“我唔可以话炒你，因为我
都揾唔到炒你鱿鱼嘅理由，我只可以话我接受你退出比赛嘅呢个请求。我十分欣赏你呢个人！”于是，文森特
如愿退出比赛，而皮尔斯则可以安心噉抹咗头上嗰一额汗。临走嗰时，皮尔斯亦不忘同文森特握手拥抱道别，
以表惺惺相惜。
稍顷，喺Ｔｒｕｍｐ Ｔｏｗｅｒ楼下，着住件长褛、戴住副黑超嘅文森特施施然噉行出嚟——佢嘅身后
虽然冇一个跟班，但系嗰种十足嘅大佬气度就挡都挡唔住！你一啲都睇唔出，佢头先正喺楼上同人哋詏到面红
面绿、青筋暴现，甚至出言恐吓对方……
我好钟意文森特嘅嗰种气势，亦都好赞同皮尔斯兵不厌诈嘅观点——虽然杜林普曾经取笑过佢哋英国人最
擅长系搜集情报（事实上，英国军情六处系全球六大间谍机构之一，其余五间系俄罗斯对外情报局、中国国家
安全部、印度调查分析局、巴基斯坦三军情报局、以色列“摩萨德”间谍组织，连美国中央情报局［ＣＩＡ］
都唔及佢哋！），更加欣赏杜林普处事公正严明，并不以个人喜恶为判断标准！
“Ｍｙ ｌｉｆｅ ｉｓ ｆｉｇｈｔ ！”——由细到大，我嘅人生路都充满咗竞争同挑战！冇法子啦
——不招人妒是庸才，我都好明白啲人嘅痛苦嘅！冇我ＩＱ咁高，读书又唔及我多，谂嘢又唔及我细致周密，
创意又唔及我咁丰富，讲到号召力就更加唔使讲！而我又的确几威胁到佢哋嘅，可能阻住佢哋成名，或者窒碍
佢哋嘅威望……
最终，佢哋只可以徒叹一句奈何：“既生瑜，何生亮？”——呢句说话即使喺最近唔系咁流行，相信迟下
都会好流行……因为，《赤壁》吖嘛！
最后，将呢篇文送畀好钟意打机，成日浸淫喺各式各样战斗之中嘅炽天使！
