呢几日都有人喺唔同场合盛赞我有先见之明——因为广州前日开始喺地铁实施“安检”嘞。有人话，可能
系啲潜伪窥私嘅人睇完我７月５号写嘅《不如全国地铁一齐安检》之后，走去报畀佢嘅主子知，佢嘅主子知道
咗之后，考虑到呢个问题嘅严重性——知道佢自己实孭唔起，于是就马上安排咗一次反恐演习，并且迅速调配
咗人手，临时拉伕，喺广州地铁总公司同地铁公安分局揾咗唔够二百人，经过简单培训就组成“安全检查队”
对乘客携带物品进行运输安全检查。
哈哈！认真儿嬉！地铁公司安全监察部长兼保卫处长刘国祥竟然话，目前一百个安检员嘅配置已经足够，
迟下睇过实际情况点再决定是否需要增加人数。须知道，家下广州地铁连通道式Ｘ光机、液体检查仪、爆炸品
检查仪……等设备全部都未到位，而且嗰一百几人只系分布喺广州东站、体育西、烈士陵园、公园前、坑口、
火车站、客村、新港东、万胜围、天河客运站等十个地铁车站驻点检查，有咩“安全”可言？单系“公园前”
一个站，我睇如果系轮三班嘅话，一百人都唔知够唔够啦！何况而家嗰啲“先进设备”全部欠奉，一味系靠啲
安检员学中医噉样“望闻问切”，未查出违禁品之前，已经毒死啲检查员——因为日日闻埋晒各式不明气体，
唔毒死都可能得个“非典型鼻炎”／唔知咩肺病／癌症……
再讲，只系检查十个地铁站，其余嗰几十个点呢？如果我系“孔布分子”，走去其它低设防嘅车站入闸，
跟住想点，唔使多讲啦？！查实，广州地铁真系有好多安全漏洞！好在我唔系“孔布分子”，否则地铁有难！
不过，我又唔会喺我呢处讲出嚟，免得教精咗广州地铁嗰班废柴！有功就佢领，有祸就乘客当——冇厘着数又
笨实嘅嘢，揾过第个去做！唔好烦我——弊！啲“孔布分子”会唔会因此走嚟绑架我去咖？！
讲到“孔布分子”，日前一个据讲应该系全世界最大嘅“孔布组织”嘅“孔布分子”头目——赖斯去访问
纽西兰，点知道就畀人悬红通缉，话要将佢交畀国际战争罪行审判法庭审判！
赖斯２５号晚抵达咗纽西兰，奥克兰大学学生会主席杜大卫当日就宣布悬红５０００纽元（大约３７００
美元），“缉拿”赖斯：由于赖斯“喺督导非法侵略与继续占领伊拉克所担任嘅角色”，任何捉拿到佢嘅人将
可以获得五千纽西兰元。杜大卫话：“我哋给予纽西兰学生一个机会，等佢哋喺学生生涯中有所表现，并且为
全球正义效力！”不过由于受到当地警方嘅恐吓威胁，为咗安全起见，学生会喺稍后将呢个“通缉令”撤回。
但系杜大卫话：“不过我哋主张捉拿赖斯嘅诸多正当理由并未改变！”
点知翌日，即系寻日２６号，纽西兰首都惠灵顿嘅维多利亚大学发出咗新嘅“通缉令”，并且将缉拿赖斯
嘅悬红奖金提高咗一倍，即系１００００纽元（大约系７４００美元）。维多利亚大学学生会认为赖斯应该为
２００３年伊拉克战争以来死于非命嘅６０万伊拉克人负责，佢“应该受到国际战争罪行审判法庭嘅审判！”
奧克兰２６号当日遭遇咗多年罕见嘅暴风雨袭击——连个天都唔妥赖斯呢个女魔头到访，但仍有大约７０
名展示愤怒嘅群众不顾恶劣嘅天气，喺纽西兰总理同赖斯会谈嘅所在地——总督府外面抗议美国发动对伊拉克
嘅战争，并且焚烧咗一面美国国旗。抗议者高举住“美国系恐怖国家”等标語牌，要求将赖斯“作为战争罪犯
加以通缉”。
而赖斯就喺会谈之后嘅新闻发布会上，高度评价纽西兰喺南太平洋地区发挥嘅作用，称道纽西兰系美国嘅
“密友”同“盟友”——有着数就“密友”同“盟友”，冇着数嗰阵唔知唔知会是敌或友呢？赖斯话，近年美国同
纽西兰重新调整咗双边关系同合作，以应对“９·１１”事件发生之后出现嘅新形势，两国喺反恐合作、海上
安全同减灾等领域加强咗磋商。赖斯当日重同纽西兰外长举行咗会谈，就两国展开自由贸易谈判、斐济局势等
问题交换咗意见。纽西兰外长喺会谈结束后对记者表示，希望两国早日达成自由贸易协议。对此，赖斯反应并
唔积极，只系表示愿意将呢个建议带返国內考虑——嗱，呢啲就系佢嘅真面目嘞！冇着数嘅嘢，睬你都傻啊！
返到去美国得闲谂返起先算啦！况且重有几个月，赖斯就要执包袱返乡下耕田嘞，到时系共和党话事定民主党
揸庄都未知，使乜而家去谂呢？
虽然话有人以“非法入侵并持久占领伊拉克”违反《日内瓦公约》为由，向警方报案要求缉捕赖斯，但系
赖斯都系无惊无险噉喺今日离开咗纽西兰，前往南太平洋岛国萨摩亚首都阿皮亚。佢将会喺嗰处作短暂停留，
会见太平洋岛国论坛成员国嘅领导人。
对于佢喺纽西兰被人悬红缉捕，赖斯就表现得颇不以为然——佢喺澳洲西部城市珀斯举行嘅记者会上话：
“抗议系民主社会嘅一部份，尤其是学生抗议呢个长期光荣传统向来喺民主社会中都得到尊重。”跟住又话：
“我只能够讲，喺呢场反恐战争中，美国已经尽力遵守国际法与我国嘅法律以及义务。”——佢真系无耻得嚟
又够大言不惭！
虽然系振振有词，但赖斯做过乜，我哋大家都有目共睹！所以我支持缉捕赖斯！出嚟行，有啲嘢迟早都系
要还嘅！既然卡拉季奇逃亡咗十几年、萨达姆着咗大半年草都畀人捉到，噉我相信，第日到赖斯落台、布薯仔
收皮之后，一定都会有人嚟揾佢哋算清呢啲旧帐嘅！阿扁最近嘅遭遇就系友坂理惠个细佬——有版你睇！
