“母语”，喺卢总嗰本商务印书馆９０年版嘅《现代汉语词典》，同蚊瞓葛最近畀卢总嗰本９９年修订版
嘅《现代汉语词典》里面，都系同样嘅解释：一个人最初学会的一种语言，在一般情况下是本民族的标准语或
某一方言。９０年版嘅《现代汉语词典》定价十六个九，９９年修订版嘅《现代汉语词典》定价五十五文——
虽然年代同价钱唔同咗，但“母语”嘅定义并冇改变到。

　　维基百科嘅解释则系：母语，亦称第一语言，系一个人最早接触、学习、并掌握嘅一种或几种语言。母语
一般系自幼就开始接触、并持续运用到青少年或之后；而且一个人所受嘅家庭或正式教育中，尤其是早期，有
相当部分系通过母语传授嘅。

　　联合国教科文组织喺对相关术语进行界定时，将母语同“本族语”视为同一概念，认为母语或本族语系指
“人喺幼年时习得嘅语言，通常系思维同交际嘅自然工具”。

　　陈小力喺２００６年７月嘅《中华读书报》里面讲过：母语，系一个人自咿呀学语的孩童时代就浸染其中
并在成长中受到其文化内核影响的语言。

　　卢总对母语嘅诠释最为言简意赅：母语，就系“母亲的语言”。母语，唔单止系妈妈所操持嘅语言，更加
系哺育我哋成长嘅乳汁，所以卢总一向都会视“母语”为“母乳”。

　　既然母语系母亲嘅语言，噉一切就简单啦——卢总嘅妈妈就系土生土长嘅广州人，自细就系讲广州话嘅，
噉顺理成章，广州话就系我卢总嘅母语！我谂，好多广州人都同卢总一样，以广州话为自己嘅母语——广州话
有两千几年嘅历史，系中华民族嘅瑰宝同文化遗产！我哋以自己嘅母语为荣！我哋为祖上就传承落嚟嘅广州话
而自豪！

　　但系最近居然有人喺卢总面前叫嚣：“普通话”、“国语”系我哋嘅“母语”——呢种人除咗有唔怕死嘅
大无畏精神之外，就只系显示到佢哋数典忘祖、知识贫乏、无知无根！喺两广地区一带，有两种人会对普通话
不以为然：一种就系文化水平唔高，但本土人文文化意识浓厚嘅人；另外一种就系文化水平比较高，对历史有
比较深入、透彻了解同认识嘅人。而对普通话推崇嘅人，则只不过系接受咗一定嘅教育，但又唔了解历史事实
嘅人！

　　首先我哋嚟睇下咩叫做“普通话”。《现代汉语词典》里面嘅解释系：现代汉语的标准语，以北京语音为
标准音，以北方话为基础方言，以典范的现代白话文著作为语法规范。

　　“普通话”呢个词最早喺清末时期出现。１９０２年，学者吴汝纶去日本考察，日本人曾经向佢建议中国
应该推行国语教育嚟统一语言。喺谈话中就曾经提到“普通话”呢个名称。１９０４年，近代女革命家秋瑾到
日本留学，佢同留日学生组织咗一个“演说联系会”，拟定咗一份简章，喺呢份简章之中就出现咗“普通话”
嘅名称。１９０６年，研究切音字嘅学者朱文熊喺《江苏新字母》一书中，将汉语分为“国文”（文言文）、
“普通话”同“俗语”（方言）。佢唔单止提出咗“普通话”呢个名称，而且明确噉帮“普通话”下咗定义：
“各省通行之话。”

　　“普通话”嘅定义，喺解放前嘅几十年一直都系唔明确嘅，亦存在唔同嘅睇法。“普通话”一词被朱文熊
首次提出之后，瞿秋白等亦曾提出“普通话”嘅讲法，并与茅盾就普通话嘅实际所指展开争论。经过“五四”
之后嘅白话文运动、大众语运动同国语运动，北京语音嘅地位就得到确立并巩固。

　　１９５５年１０月召开嘅“全国文字改革会议”同“现代汉语规范问题学术会议”期间，张奚若喺“全国
文字改革会议”嘅大会主题报告中讲：汉民族共同语早已存在，现定名为普通话，需进一步规范，确定标准。
于是汉民族共同语嘅名称就正式定为“普通话”，并同时确定其定义，即“以北京语音为标准音，以北方话为
基础方言”。

　　１９５５年１０月２６号，《人民日报》发表咗题为《为促进汉字改革、推广普通话、实现汉语规范化而
努力》嘅社论，文中提到：“汉民族共同语，就是以北方话为基础方言、以北京语音为标准音的普通话。”

　　１９５６年２月６号国务院发出咗《关于推广普通话的指示》，将普通话嘅定义作出咗增补同完善，正式
确定咗普通话系“以北京语音为标准音，以北方话为基础方言、以典范的现代白话文著作为语法规范。”——
呢个定义从语音、词汇、语法三个方面明确规定咗普通话嘅标准，使普通话嘅定义更为科学、更为周密。其中
“普通”二字嘅涵义系“普遍”同“共通”嘅意思。从此，“普通话”一词先开始以明确嘅内涵被广泛应用。

　　我哋再嚟睇下“普通话”嘅由来。

　　普通话前身系古代北方官员嘅官话，因为北京做过多朝首都，官话亦就更接近北京话，今日南京方言唔似
其它苏南地区，亦因为南京做过多朝首都，有啲接近官话。

　　普通话嘅语法标准系“以典范嘅现代白话文著作为语法规范”，呢个标准包括四个方面嘅意思：“典范”
就系排除非典范嘅现代白话文著作作为语法规范；“白话文”就系排除文言文；“现代白话文”就系排除五四
以前嘅早期白话文；“著作”就系指普通话嘅书面形式，佢建立喺口语基础上，但又唔等于一般嘅口语，而系
经过加工、提炼嘅语言。

　　照噉睇，“普通话”嘅历史都只不过系５１年，但系我阿妈都就快７０啰噃，佢冇理由十几岁先学讲说话
嘎——噉讲，“普通话”又点可能系我哋嘅母语呢？

　　至于“国语”一词就有啲无稽——完全系由一班从大陆走去台湾嘅中华民国遗老搞出嚟嘅！

　　“国语”喺《现代汉语词典》里面嘅解释有两个：①指本国人民共同使用的语言。在我国是汉语普通话的
旧称。②旧时指中小学的语文课。

　　但今时今日我哋所讲嘅“国语”呢个词，其实系来自我哋祖国嘅宝岛——台湾！

　　１９０９年，清政府设立咗“国语编审委员会”，将当时通用嘅官话正式命名为国语。呢个系汉语标准语
首次得到官方命名。

　　１９１１年，中华民国成立，汉语标准语推动计划就重新进行。１９１３年嘅中国读音统一会制定咗史称
“老国音”嘅“国音”系统，佢嘅特点系“京音为主，兼顾南北”，具有入声。“统一会”重制定咗注音字母
第一式。此后，“国音”喺中国全国范围內推行。到咗１９２４年～１９２６年，增修国音字典委员会将国音
修订为“以北京嘅普通读法为标准”，即新国音。

　　１９３２年５月，中华民国教育部正式公布并出版咗以新国音为准嘅《国音常用字彙》，呢个代表住现代
汉语标准语第一个系统——国语系统嘅正式成形。１９３２年～１９４９年以来嘅国语广播，基本上都采取以
《国音常用字彙》为基准嘅形式，各地嘅汉语标准语系一致嘅。１９４９年以后嘅国语系统、普通话系统以及
华语系统，都系源于呢个时期嘅国语系统。

　　１９４９年之后，台湾同中国大陆嘅汉语标准语（分别为国语系统同普通话系统）沿住不同嘅轨迹发展。
此外，喺东南亚等华人地区，有源于国语系统嘅华语系统。

　　台湾于１９４５年至戒严结束，一直以中华民国大陆时期嘅国语发音作为汉语标准语，尽管台湾大多数人
嘅国语发音同呢种“标准音”有住明显嘅区别。戒严结束之后，台湾大多数人嘅国语发音已经被台湾主流社会
所接受，被称为“台湾角语”，而自中国大陆带过嚟嘅冇“台湾味”嘅“标准”国语发音（如邓丽君嘅发音）
则冇喺台湾年轻人中流行，成为咗“老派国语”。

　　而“国语”一词亦随住大陆嘅改革开放同两岸通商，吹遍神州大地，横跨大江南北。最普遍嘅现象就系，
我哋可以见到好多影视光碟包装都会写住“粤语”同“国语”。

　　即使如此，“国语”相较于有两千几年历史嘅“广州话”，始终都系“小巫见大巫”。

　　“国语”同“普通话”之间嘅差别其实系相当明显嘅！至于盛行于东南亚华人社区嘅“华语”，往往特指
汉语标准语，而唔系指东南亚华人最常见嘅几种母语——汉语南方方言。东南亚华语嘅标准语大致继承咗老派
国语——普通话嘅体系，但系日常生活中嘅发音、辞彙，甚至语法都往往受到母语方言以及非汉语嘅影响，同
普通话、国语有一定嘅差别。

　　２００７年３月９号到１０号，喺北京语言大学隆重举行咗“２００７年国际母语日”活动，今年活动嘅
主题系“弘扬多元文化，共建和谐世界”。

　　１９９９年１１月， 联合国教科文组织嘅一般性大会宣布：从２０００年起，每年嘅２月２１号系“国际
母语日”（International Mother Language Day）。纪念国际母语日，旨在促进语言同文化嘅多样性，
以及多语种化。

　　新华网更加指出，语言系保存同发展人类有形同无形遗产嘅最有力工具。各种促进母语传播嘅运动唔单止
有助于语言嘅多样化同多语种嘅教育，而且能够提高对全世界各语言同文化传统嘅认识，以此喺理解、容忍同
对话嘅基础上，促成世界人民嘅团结。

　　根据我国国情，汉语方言会喺一个相当长嘅时期内与民族共同语并存。推广普通话并唔系要禁止或者消灭
方言。但实践已经证明，目前推广普通话嘅政策同做法破坏咗社会嘅和谐、损害紧民族嘅团结。

　　记得我哋喺中学时期曾经读过法国作家都德嘅《最后一课》。文章教导我哋，一个民族只有先学会自尊，
先至可以得到其他民族嘅尊重，而自尊包括对自己语言嘅热爱同尊重。当韩麦尔先生谈到法国语言时话：一个
民族沦为奴隶时，只要牢牢记住佢哋嘅语言，就好似攞住一把打开监狱大门嘅锁匙……听到呢度，经常逃课嘅
小弗郎士都感到平时讨厌嘅法语语法喺呢一刻变得格外亲切，唔再系咁难明嘞！

　　以广州话为代表嘅粤语方言，使用人口占汉族总人口嘅百分之五左右，分布喺广东、广西两省；比较使用
湘方言、赣方言、客家方言、闽方言嘅人口都要多；如果计埋海外操粤语嘅华人及其后裔，相信比全国第二大
方言——江浙地区嘅吴方言重要多人！而且建国以嚟，粤剧一直都系为祖国创收最多外汇嘅表演艺术！

　　据历史考证，广州话保留咗最多古汉语嘅语法同埋句式结构，而我哋今日所讲嘅普通话，并唔系最正宗嘅
汉语，而只不过系同北方嘅各族方言混合后嘅产物而已！粤语先至系我国古代最早嘅普通话嘅活化石！

　　因此，请大家搞清楚，乜嘢语言先至系我哋嘅“母语”，边种语言先至系真正滋养我哋成长嘅乳汁！每个
民族或者地区嘅人民都有自己本民族或者本地区嘅“母语”，无论“普通话”，定系“国语”都只不过系一种
用于日常交往、沟通嘅语言工具，绝对唔系我哋嘅“母语”，更加唔系咩高贵嘅语言！嗰啲将“普通话”当成
系“母语”嘅人更加系连猪狗都不如！

　　所以，请各位热爱并使用我哋自己嘅母语！